МагъчIваялъе рес

Гьанже лъималазги "флешкаби" рехула


Боевиказул хитIабазда релъарал лъималаз гьарурал хитIабал раккулел руго интернеталда. Гьел видеороликазда лъималаз тIалаб гьарулел руго, мисалалъе, школалда лъикIал къиматал, компьютерал, расанкIаби ва гь.ц.

Изну гьечIого яргъид гIуцIаразда гъорлъ унез флешкаби ритIулаан хIакимазухъе, бизнесменазухъе. Жидее гIарац кьечIони, дуе яги дур гIагарлъиялъе рахIат тезе гьечIилан абула боевиказ гьел бизнесменазда видеороликазда.

Гьединал роликал тIиритIун руго интернеталда. Школазда цIалдолезул телефоназдаги рукIунаан гьел. ЦIалдолез роликал цоцазухъ рехун тIиритIизарулаан.

Боевиказул хитIабазухъги ралагьун школазда цIалдолез жидерго махсаро хIисабалда рахъарал видеороликал лъун руго интернеталда. Эркенлъи радияолъул мухбирасе YouTube сайталда лъабго гьединаб видеохитIаб батана. Гьеб лъабабго видеоялда лъимал кIалъел руго магIарул мацIалда.

Мисалалъе, цояб роликалда гьитIинав васас (тIад балагьун 6-7 сон бугев) видеоялда хитIаб битIулеб буго щивалиго ГIабдулвахIидихъе. Гьесухъа тIалаб гьабулеб буго мотциклги, кIиго миллион гъурущги.

Цогидаб роликалда школалде цIалдолез директорасда лъазабулеб буго жиндир аттестаталда щуйилал лъечIонани, жинца гьев чIвазе вугилан.

Лъималазул гьел хитIабал гьадингосел жал ругин, гьезухъа хIинкъи гьечIилан абулеб буго полициялъ.

Ригьалде рахинчIел лъималгун хIалтIулей полициялъул инспектор Индира Агаевалъ абухъе, полициялда лъала гьединал роликал интернеталда рукIин.

Индира Агаева: «Интернеталда ракун руго гьединал видеороликал. АбичIого щиб гьабилеб, лъималазул гьел ишал рекIее гIолелги гьечIо, ракI судизабулеб буго гьединал ишаз.

Гьел роликал махсараби рукIин киназдаго бичIуле буго, амма гьединал махсараби ричазе бегьуларо. Гьеб кинабго ккола гьел лъималазул улбузул гъалатIлъун. Гьез бичIизабун гьечIо лъималазда, гьединал роликал рахъине бегьуларин.

Лъималазухъ гьанже кодор телефонал руго, гьезда интернеталдаса боевиказул хитIабал рихьулел руго. Гьелдалъун гьединал гIантал махсараби гьаризе ракIалде ккун батила гьезда.

Гьел флешкаби учительзабухъе яги цогидазухъе лъималаз ритIун ругин абураб хабарги рагIичIо. Гьел ритIун рукIун ратании, учителал полициялде рачIинан».

Дагъистаналда бугеб ахIвал-хIал лъималаз махсаробазда сверулел букIиналъул хIужаби гъоркьисалаги ккун рукIана республикаялда.

Мисалалъе, МахIачхъалаялда троллейбусалде жаниб I3-I4 сон барал лъималаз «Аллагь акбар!» - иланги ахIун рехана чIегIераб пакет. Гьез жидецаго гьабун буго бомбаялъул муляж ва копое гIоло рехун буго машинаялде жанибги.
XS
SM
MD
LG