МагъчIваялъе рес

ГIабдусаламов МухIамадие мадар кколеб буго


ГIабдусаламов МухIамад

Дагъистаналдаса боксер ГIабдусаламов МухIамадица квер багъаризабуна абураб информациялъ рохизаруна араб анкьалда гьесул сахлъиялъул хал ккурал дагъистаниялги цоги МухIамадие ккаралда гIагалун рукIаралги. Гьединалги дагьал гьечIин абизе бегьула гьесул вац ГIабдусаламица бицаралде балагьун. Боксалъулгун яги спорталъулгунцин бухьен гьечIел гIемерал гIадатиял американиял МухIамадил сахлъиялъул хIал цIехезе азарханаялде рачIиналъ жидее кIудияб асар гьабунин бицана гьес Эркенлъи радиоялъе кьураб интервьюялда.

Вац сахлъизе вукIиналда ракI чIараб буго ГIабдусаламил.

ГIабдусаламов ГIабдусалам: «Гьанже тохтурзабаз абулеб буго хьул цикIкIунеб бугин. РакIалъул кьабиги, бидул тIадецуйги, ботIрода жаниб бидул тIадецуйги рукIалиде бачIине ккола цинги гьев аппаратаздаса ватIа гьавизе вуго.

ТIоцересел къоязде дандеккун жал гIемерго гIодоре риччан ругин ва тохтурзабаз бицунебги хьул лъезабулеб хабар бугин абуна ГIабдусаламица жеги.

ГIабдусаламов ГIабдусалам: «МахIамадие операция гьабулеб букIана сагIатгун бащдабгIанасеб заманаялъ. Гьесул тохтурас абуна 30 соналъ ботIрое жагъаллъи ккарал унтабазе дару гьабулеб бугин жинца, амма гьесул гIадинаб захIматаб хIал бугев кIиго чи гурони жинда дандчIван вукIинчIин. Гьесие 50 сон букIарабани, жинца гьев тIадеги восизе вукIинчIин. Гьев спортсмен вукIиналъ ва гьесул жиндирго черх унтуде данде къеркьезе букIиналда хьул букIиналъ тIаде восулев вугин жинца гьев, гурони гьесда хьул гьечIин».

МухIамадил гIадазул нахулъ гьитIинаб бакIалда би сверун букIун буго. Гьебги ккун буго гьев рингалда вукIаго тIоцересел раундаздаго. БукIаниги гьев вагъун вуго ахиралде щвезегIан.

Тохтурзабаз операциялдаса хадув комаялда чIезавурав МухIамадил квералда гьанже тохтурас рукIкIен хIунчидал цогияб квералъ гьев нахъе цузе къасд гьабун буго гьес. Гьеб лъикIаб ишара бугин рикIкIунеб буго тохтурзабаз. Гьедин лъазабуна журналистазда МухIамадил менеджер Борис Гринбергица.

ГIабдусаламов МухIамад Нью-Йоркалъул Рузвельтил цIаралда бугеб азарханаялде щвезавун вукIана гIагараз ва гьудулзабаз 2 ноябралда кубаялдаса Майкл Пересгун букIараб къеркьеялдаса хадуб. Гьесул гьудул ГIабдулал пикруялда гьеб дандечIей байбихьудасаго мекъса унеб букIана.

ГIабдула: «Узухъда, нижее бокьун букIинарищха МухIамад бергьине, амма байбихьудасанго иш битIун унеб гьечIолъи бихьулеб букIана. Гьесда гIемер кьабулеб букIана. Гьесгияли жаваб кьолеб букIана, амма бичIчIулеб букIана дандечIей кидаго унеб букIарабгIадаб гьечIолъи. Иш мекъса унеб букIана. Гьенире гьоркьоре лъугьине нижер рес букIунарелъул. дандечIей чIезабизе яги цоги тадбирал гьаризе профессионалаллъидал гьенир рукIарал тренералги тохтуралги».

ГIагарал тIад-тIад руссун балагьулел руго гьеб дандечIеялъухъ.

Гьеб букIана МухIамадил 19-билеб данделъи. Гьелдеялде 18 нухалда гьев бергьун вукIана жиндир дандиял нокауталде ритIун.

1981 соналда МахIачхъалаяда гьавурав ва гIурав ГIабдусаламов профессионалияб боксалде вачIуна 2008 соналда. Гьелдаса нахъе бергьенлъаби гурони рукIинчIев МухIамадида кIвечIо 2 ноябралда WBC версиялда америкаялъул чемпионасул цIар цIунизе, Пересикьа къана гьев. ТIоцебесеб раундалда квер беканиги 10 раундалъ гьесие дандечIей гьабула МухIамдица.

МухIамадил буго лъабго лъимер. КIудиясе микьго сон, гьитIинасе микьго моцI. Гьесул хъизанги эбел-эменгун вац-яцалги руго Америкаялда.
XS
SM
MD
LG