МагъчIваялъе рес

Адвокат юхаразул цояв ахираталде къокъана


МухIамадова Сапият: "Лъабго соналъ цее дун юхаралдаса хадуб чанго нухалъ вихьун вукIана дида Батирби. Гьес дие кумекцин гьабулеб букIана".

Хамиз къоялъ Хасавюрталда чIван вуго полициялъул капитан Магьдиев Батирби. Гьесде кьвагьдон руго документазул хал гьабизелъун лъалхъизабураб автомобилалъусан. Кьвагьа-гIанхъи ккараб бакIалда лъукъел ккун буго аскIосан уней гIолохъанай ясалъеги. Магьдиев Батирби ккола 2010 соналъ адвокат Сапият МухIамадова кьабурал полициялъул хIалтIухъабазда гьоркьов вукIарав чи.

Полициялъул капитан Магьдиев Батирби чIван вуго Хасаювюрталда октябралъул 17 къоялъ. Изну гьечIого яргъид гIуцIараздаги полициялъул хIалтIухъабаздаги гьоркьоб кьвагьа-гIанхъи ккун бугин гьенибилан баян кьун букIана информ.алатаз.

Гьеб баян гьоркьоб заман ун хадуб цIигьабулеб букIана. Рохьилазул цо чи чIван цо полициялъулав лъукъунги вугилан. ГIемерго заман иналде лъана полициялъулав хун вугилан.

Гьев ккола хасаб къукъаялъул командир Магьдиев Батирби. Цадахъ хIалтIулеца гьесда гьединго абулеб букIун буго ГIамайиланги. Эркенлъи радиоялъухъе щвана цойги цIияб баян. Батирби ватана 2010 соналъ адвокат Сапият МухIамадова кьабурал полииялъул хIалтIухъабазул цоявлъун.

Гьеб баян нижее кьуна жийго Сапиятица. Сон шагьаралда букIараб кьвагьа-гIанхъи рагIун буго гьелда. Гьелъул мухIканлъи цIехон Хасавюрталъул жанисел ишазул идарялде кIалъайдал гьелда бицунеб буго Батирби лъукъун вугилан, дагьаб хадусан хваниланги ахIун буго.

Гьаниб абичIого гIоларо 2010 соналдаса нахъе жийго кьабурал полициялъул хIалтIухъаби тамихIалде цIай тIалаб гьабун диванханаялъул прокуратураялъул ва цIех-рехалъул комитеталъулгун дагIбаялда йиго Сапият гьабсагIтаги.

Хун вугилан рагIидал ракIги гурхIанин жиндир гьесда, амма гьесдаса тIаса лъугьине ракIалда букIинчIилан жиндаян абулеб буго гьелъ жакъаги:

МухIамадова Сапият: «Лъабго соналъ цее дун юхаралдаса хадуб чанго нухалъ вихьун вукIана дида Батирби. Гьес дие кумекцин гьабулеб букIана хIалтIуда жаниб. Гьеб гуребги лъалел хъвалезухъ ругьелги битIун бачIунаан тIаса лъугьайилан абейин жиндасаян.

Амма дида тIаса лъугьине ракIалда букIинчIо лъугьинеги лъугьунароан. ЧIван вугилан рагIидал ракIги бухIана, гьереси бицинаро. Амма дун кьабулел рукIарал гIолохъабазда цадахъ гьев вукIанилан абураб пикруялъ кинго рахIатги толеб гьечIо.

Гьев хун вугилан дихъе гьесулго пишацояв кIалъан вачIаравго дун божулей йикIинчIо, дун махсароде кколей ятилин гьес, гьесда лъалеб букIаралъул гьесулги дирги букIараб гьоркьоблъиялъул, гьединлъидал ургъунго бицунеб хабар батилин гьесилан ккун букIана.

Амма гьес кIиабизеги такрар гьабуна кIиго сагIаталъ цевеги дида цадахъ гIодовги чIун вукIарав Батирби гьанже тIокIалъ гьечIилан. Гьеб мехалъ божана ва гIажаиблъизаюна гьеб хабаралъ».

Сапиятил ишалда хурхун диванханаялъул халгьаби тIобитIизе кколаан октябралъул 16 къоялъ, амма I8 къоялде нахъбахъун буго гьеб гьедин нахъе бахъун гIайиб гIунтизабулел чагIи нахъе риччан гIемерал квал-квалал гьаруна Сапиятие.

Дун юхараб соналъго лъалеб букIанин жинда гьедин цIа-цIазе букIин цIех-рехалъул иш, амма лъалеб букIаниги къануналда рекъон гIайибиял чагIазе тамихI къотIизе кколилан абураб пикруялъ нахъаса йичIичIого гьалда хадуй чIанин жий:

МухIамадова Сапият: «ГьабсагIатги хьул гьечIо дир жакъа тIобитIулеб диваналъул халгьабиялдаса хадубги дие пайдаяб куцалъ хис-баси ккелин гьеб ишалъулъилан.

Кинан букIаниги халгьабиялда жанир хиса-басиял гьаризе ккола, гIайиб гIунтIизабулезул цояв Батирби хваралъул.

Гьелдаса хадуб кIиабизеги, лъабабизеги диванханаялъул хIукмуялда дунго рази гьечIилан гIарза хъваялъулги магIна букIинарилан ккола.

ГIицIго балагьила жакъасеб диваналъул данделъиялъул хIасил кинаб кколебали».

Гьаб моцI байбихьаралдаса Магьдиев анкьабилев полициялъулав ккола Дагъистаналда чIварав.
XS
SM
MD
LG