МагъчIваялъе рес

"Анжиялъ" толеб буго премьер-лига


МахIачхъалаялъул «Анжи» команда махIрумлъана премьер-лигаялъул хIаяздаса. Ахирисеб дандчIваялда гьеб къуна Краснодараялъул «Кубань» командаялдаса, турниралъул сияхIалда ахирисеб бакIалдасан цебехун борчIизе кIвезе гьелда. Клубалъул нухмалъиялъ гьелда бан комментариял кьезе инкар гьабулеб буго. Анжиялъул футболалда хадур хал кколел дагъистанияз «Эркенлъи» радиоялъе загьир гьабулеб буго гьединаб ахир махIачахъалялъул клубалъе ккеялъе кинал гIиллаби рукIаралали.

11 маялда Краснодараялъул «Кубань» командагун букIараб «Анжиялъул» хIаялде кIудияб хьул букIана футбол бокьулел дагъистаниязул. Анкьалъ цебе Грозныялъул «Терек» командагун хIалаго, гьелда тIад бергьенлъи босун хадуса гIемерисел божун рукIана футболалъул сезоналда хутIараб кIигоги хIаялда бергьенлъиги босун, премьер-лигаялдаса нахъе инчIого хутIизе бугеб ресалдаса пайда босилин Анжиялъул футболистазилан. Амма гьатIан къоялъ букIараб дандчIваялда «Анжи» къуна ва гьеб премьер-лигаялда тIокIаб хIазе гьечIилан абураб баян къватIибе кьуна цадахъго чанго информация тIибитIизабулел алатаз.

Клубалъул нухмалъиялъ гьелда бан жеги комментариял кьезе инкар гьабулеб буго, Анжиялъул цогиги хIай бугин, гьелдаса хадуб гурони жидеца баян къватIибе кьоларилан абуна клубалъул пресс-хъулухъалъул хIалтIухъабаз.

«Черновик» газеталда Терекалъулгун букIараб Анжиялъул дандчIваялъул ва премьер лигаялда хутIизе гьелъул бугеб ресалъул бицунеб макъалялда гъоркь жидерго комментариял тарал дагъистаниязул цIикIкIарасеб бутIа божулеб букIинчIо хутIараб кIигоги дандчIваялдаги бергьун «Анжи» премьер-лигаялда хутIилин абураб жоялда. Анжиялда унго-унгоял футболистал гурел, Керимовасул гIарцухъ майданалда рекерулел легионерал ругин ва олигархасул гIарац къотIизе тани, гьезги дагъистаналъул клубалъулгун къо-лъикI гьабизе бугилан хъвалеб бугоан чанго чияс. Гьединго цIикIкIарасеб бутIаялъ гъвел гьабулеб бугоан клубалъул бетIерав тренер ХIажи ХIажиевасдеги, гьесул унго-унгояб махщел гьечIин команда хадуб цIазеян абулеб буго футбол бокьулез.

Гьединабго пикру буго «Анжиялъул» киназдего гIагарун хIаязда хадуб хал ккурав МахIачхъалаялдаса Даганов Айдемирилги. ТIоцебесеб иргаялда Анжиялъ борчIизе танин гьелъул аслиял конкурентал Томь, Локомотив, гIадал командабазда тIад бергьенлъи. ХIажиевасул ккараб гъалатIалъул гьадин бицана Дагановас «Эркенлъи» радиоялъе.

Даганов Айдемир «Клубалъе нухмалъи гьабизе тIамуравго гьесухъе кодобе кьуна кинабго сурсат, амма лъицаниги гьесдаса тIалаб гьабичIо жавабчилъи. Хасалил хIухьбахъиялдаса хадуб «Анжи» хIачIо хIазе кколеб букIараб къагIидаялъ, гьелъул бергьине рес букIарал гIемерал хIаял рукIана, амма бергьинчIо. ХIажиев кIудияб хIалбихьи бугеб тренер вукIаниги гьесда кIвечIо команда цо пикруялде буссинабизе. ГIемерисел «Анжиялъул» дандчIваязухъ балагьидал дир пикру бачIунеб букIана гьел футбол хIазе гурел, данде бугеб команда хIалеб куцалъухъ балагьизе рачIун ругилан. Гьел хIаязда бергьинчIого чара букIинчIо Анжиялъе, амма чара гьечIого хIажатаб анкьго балги бакIаризе щвечIого Анжи рачIчIалтIаго хутIана».

Гьалдаса хадуб рес бугиш «Анжиялъул» гIагараб заманалда премьер-лигаялде нахъбуссинеян гьикъидал Дагановас абуна жида кколин тIоцебесеб иргаялда ижараялъе росун рукIарал футболистал нахъе инин командаялдаса, хутIизе ругин цохIо дагъистаналъул футболистал. Гьединаб ахIвал-хIалалда бигьаго букIине гьечIин «Анжиялъе» тIадегIанаб дивизионалде нахъ бусине ва гьединго бищунго аслияб суал гьениб бараб букIине бугин клубалъун хважаин Сулейман Керимовасда.

Даганов Айдемир: «ГьабсагIат такрарлъизехъин буго гьанжеялдаса 13 соналъ цебе букIарабго гIадаб ахIвал-хIал. Доб мехалъго гIадин гьанжеги «Анжи» букIана лъабабилеб бакIалда, къокъабго заманалда жаниб нахъаса-нахъе ун, турниралъул сияхIалъул ахирисеб бакIалде ккана гьеб. доб мехалъго гIадин ХIажиев бетIерав тренерлъун вукIаго ккана гьеб кинабго. Гьанже кинабго бараб буго Керимовасда, жакъа къоялъ гIадаб ахIвал-хIалги букIаго гьесие клуб цебетIезабизе бокьун батани Анжиялъул букIинесеб накIкIулъан гIадин бихьула дида, амма ахIвал-хIал хисизабизе гьесие бокьун батани гьес валагьизе ккола цIияв, гIолохъанав, тIуванго батияв тренер, ХIажи ХIажиевасул футбол жакъасеб Дагъистанлъе дандекколаро».

Краснодаралъул «Кубань» командагун гьатIан къоялъ букIараб дандчIваялдаса хадуб кьураб интервьюялда ХIажи ХIажиевас абуна жидер гIемерал ресал рукIанин бергьине амма бергьинчIин, гьанже аслияб цебе чIараб масъала бугин къокъабго заманалда жаниб клуб премьер-лигаялде тIадбуссинабизе.
XS
SM
MD
LG