Федералияб Мажлисалде цеве вахъунаго Россиялъул президент Путиница бицана лъайкьеялъул система цIигьабизе кколин ва школа лъугIулел лъималаз цогояб пачалихъияб экзаменалда цадахъ хъвазе кколин ургъун бахъараб хабар, ай сочинение. Президентасул пикруялда рекъон гьелъ рес кьезе буго лъайкьеялъул даража борхинабизе ва школалда ришватчилъиялда данде къеркьезе бигьалъи букIине буго.
Араб соналъ тIолго улкаялда цогоял пачалихъиял экзаменал кьолаго гIемерисел информалатаз бицунеб букIана бищунго гIемер гьеб экзамен кьолаго ришватчилъи бугин Шималияб Кавказалда. Цо-цо тIадегIанал цIалул идарабаз Дагъистаналдаса студентазе ургъунго балал гIодорегIанцин гьарулел рукIана. Гьединлъидал, лъайкьеялъул системаялда хиса-баси хас гьабун Шималияб Кавказалъе ургъараб бугилан рикIкIунеб буго МахIачхъалаялъул 42 абилеб школалъул гIурус мацIалъул мугIалим АхIмад Эфендиевас.
Гьесул рагIабазда рекъон, тIолабго Россиялда пикру билълъанхъун буго Кавказалда гурони ришват босуларилан, гьелъул бицана улкаялъул рищунго тIадегIанал цIалул идарабаздаян. Амма АхIмадил пикруялда рекъон, сочинение хъвазе тIамиялъ рес кьезе буго цIалдохъаби дагьал жалго ургъун хъвадарун ругьун гьаризе, гурони цебеккун цохIо экзаменалъе «у» ялъуни «гуро» абун жаваб кьей гурони жо букIинчIо. Амма ришватчилъи гьеб тадбиралъ дагьлъизе буго абураб жоялда мугIалим божулев гьечIо.
Божулев гьечIо цIияб къагIидаялъ ришватчилъи дагьлъизабиялда Дагъистаналъул пачалихъияб университеталъул мугIалим РахIимов ГIабдулаги. Гьев чанго соналъ тIатIала вукIана цогояб пачалихъияб экзамен кьолелъув комиссиялда гьоркьов. Гьесул рагIабазда рекъон экзаменалда тIаде сочинение хъванилан гьелъ ришватал росиялъул къагIидаби хисизарулел гьечIо. «Эркенлъи» радиоялъе гьес гьадинаб баян кьуна.
РахIимов ГIабдула: «Дир хIисабалда гьеб тадбиралъ кинабгIаги хIасил кьезе гьечIо, гIицIго экзаменазул багьа борхи гурони. Эбел-инсуе захIматго букIине буго экзаменал росизе. Нилъеда киназдаго мухIканго лъалелъул Дагъистаналдаги, хутIараб Россиялдаги цогоял пачалихъиял экзаменал ричун росулеллъи. Пачалихъалъ гьеб тадбир лъималазул лъай-гIакълу цIикIкIинабиялъе гIоло гьабулеб батизе бегьула, амма сочинение хъвазе тIами буго цогояб экзамен захIмалъизабилъу
Сочинениялъ лъималазул лъай цIикIкIине бугин, гьелъ хъвадаризе ва пикру гьабизе гьел ругьун гьаризе руго абураб жо битIараб гьечIо. Путиница экзамен хисизаби гурони, гьеб кьолеб къагIида хисулеб гьечIелъул, ришватчилъиялъе нухал къалеб тадбир гьечIелъул гьес бицунеб жоялда жаниб. Дун гьел экзаменазул заманалда комиссиялда гъорлъ вукIана чанцIулго ва ракIчIун абизе бегьула цIиял тадбиразулъ ришватчилъиялда данде къеркьей дида бихьулеб гьечIо».
Цогояб экзаменалъул хIасилал тIолго дунялалъул тIадегIанал цIалул идарабазда цIализе росулаго къабул гьариялда тIад хIалтIизе кколин ва цере Совет пачалихъалда жанир рукIарал пачалихъазда гьединалго экзаменал кьолеб къагIида гьабизе рес бугилан лъазабуна Владимир Путиница жиндирго хитIабалда. Амма цогояб экзаменалда тIаде сочинение хъвазе тIамиялъ гьеб экзамен захIматлъизаби гурони, лъималазул лъай борхизабиялъул ва ришватчилъи дагь гьабиялъул масъалаби тIуразе гьечIилан рикIкIунеб буго гIемерисел экспертаз.
Россиялъул парламенталде хитIаб гьабулаго хамиз къоялъ президент Владимир Путиница рехсана чанго батIи-батIияб проблема. Гьезда гъорлъ букIана цогояб пачалихъияб экзамен кьолеб къагIида хисизабиги. Щай гьаризе ккурал гьел хиса-басиял ва букIине бугищ гьезул къваригIараб хIасил?
