МагъчIваялъе рес

Полициялъул щаклъи мегежалъцин бижинабулеб рагIула


8 июналда къад МахIачхъалаялда полициялъулаз ккун вукIана «Яблоко» абураб политикияб партиялъул дагъистаналда бугеб бутIаялъул нухмалъулев Бабаев Артур. Сундуе гIоло кколев вугев, щиб гIайиб гьесда бугебали щибниги бичIчIизеги гьабичIого ккурав гьев политикас чанго сагIат базе ккун буго полициялда.

Талат къоялъул къалъуда МахIачхъала бакьулъ «Октябрь» кинотеатралда цевесан жиндирго къваригIелаз унев вукIарав «Яблоко» партиялъул Дагъистаналда бугеб бутIаялъул нухмалъулев Бабаев Артур ккуна полициялъулаз. Чанго сагIатги полициялда бан, гьесул гIага-божараз ахIи-хIур гьабизе, журналистал ракIаризе лъугьараб мехалда виччан вуго гьев.

Артур Бабаевасул гьудул ва гIагарав чи Альберт Эседовас «Эркенлъи» радиоялъе бицухъе, низамцIунулез Бабаев ккун вачун унеб мехалда гьеб тадбир тIобитIиялъе щибниги гIилла баян гьабун гьечIо полициялъулаз. ХъачIго кIалъазеги кIалъан дуе гьебщинаб жо щибизейила жидеца малъарабги гьабун вачаралъуве вилълъине кколин мунилан лъазабун буго гьез.

Альберт Эседов, жамгIияв хIаракатчи
Альберт Эседов, жамгIияв хIаракатчи

Альберт Эседов: «БитIун полициялъулаз кколев мехалда кIалъан вачIана гьев дихъе. Дидаги рагIун цIехана гьес низамцIунулезда жив щибизейила нужеца кколев вугейилан. Гьелде данде хъачIаб кIалъай гуреб тIокIаб кинабниги баян кьечIо гьез. Гьедин лъидениги кIалъазеги течIого, адвокатасухъе ахIизе ресги кьечIого полициялъул автомобилалъувги къазавун Советский мухъалъул полициялъул бутIаялде щвезавун вуго гьев. Гьениб документазул халги гьабун, щив кинали цIех-рех гьабизе лъугьун вуго. Гьес партиялъул нухмалъулесул документал рихьизаруниги, жинда гIайиб батани гьелъул бицейин гурони жив гьанив чIезавизе нужер ихтияр гьечIин абун хадуб хъачIгоги кIалъан, гьесул магжидаса разигьечIолъи загьир гьабизе лъугьун руго полициялъулал. Гьезул ихтияр щиб бахараб мегеж бугинги абун гIадамал полициялде рачине, мегеж тей гьанже къануналъ гьукъунищ бугеб? Гьеб буго гIадамазу ихтиярал хвезари, бокьани тела гIадамаз гьеб, бокьичIони течIого букIина. Лъиданиги ургъел ккезе кколеб жо гуро гьеб. Гьесда кинаб букIаниги гIайиб батани, букIине кколеб хIалалъ гьебги чIезабеха, тамихIги гьабе гьесие, гурони щибниги къанун хвезабичIев гьес мегеж теялда бараб жо щиб бугеб?».

Гьебго бахараб мегежалъе гIолойинги абун цеве-цевеги чанцIулго нухалъ ккун вукIана полициялъ Артур Бабаев. Щибаб нухалъ журналистаз ахIи-хIур бахъинабизе лъугьун хадуб виччанги вукIана гьев. Артур Бабаев ккола 2007 соналъ чIварав, инсанасул ихтиярал цIунулев, сиясатчи, тIоцебе Дагъистаналда рагьараб «Яблоко» партиялъул нухмалъулевлъун вукIарав Фарид Бабаевасул вацги. ЧIварав Фаридги чанги чиясе данде кколарев чи вукIиндал, гьесие гIоло Артуридаса рецIел босизе букIиналъе багьанаби ралагьулел ругин низамцIунулелилан рикIкIунеб буго Бабаевасул сверухълъиялдаса цо-цояз.

XS
SM
MD
LG