КIудияб Британиялъул премьер-министр Дэвид Кэмероница лъазабуна, Россиялъулгун хIалуцIараб ахIвал-хIал бугониги, Британиялъул хIукуматалъ Кремлалъулгун кIалъа-басаял халат бахъинабизе кколин Сириялъул проблемаялъул суалгун гьоркьоб. Гьес абуна гьадинал кIалъа-басаязда гIахьаллъи гьабизе кколин асар бугел киналго улкабаз – СагIудиязул ГIарабия букIа, Иран букIа, Россия букIа.
Россиялъулгун Британиялъул гьоркьобакI квешлъана 21 январала Лондоналъул диваналъ вукIарав ФСБ-ялъул офицер Александр Литвиненко чIваялда хурхараб хIукму гьабун хадусала. ДиванчагIазул пикруялда гьеб чIваялъе изну кьун букIанин хасго Россиялъул президент Владимир Путиница.
Дэвид Кэмеронил пресс-секретарас журналистазде лъазабуна КIудияб Британиялъ Россиялде данде цIиял санкциял лъазаризе рес бугин.