Россия хIадураб буго Цолъарал Миллатазул ГIуцIиялъул ХIинкъи Гьечолъиялъул Шураялъ ТIалибан багъа-бачариялде данде лъазарурал санкциял тамахлъизариялъул суал цIодорго дандбазе, гьединаб ишалъ Афгъанистаналъе зарал гьабизе гьечIони, ян лъазабуна Афгъанистаналда Россиялъул президентасул хасав вакил Замир Кабуловас.
Араб анкьида гьес лъазабуна Россиялъул гIаммал интересал ругин ТIалибангун террористикияблъун рикIкIунеб «Исламияб пачалихъ» абулеб гIуцIиялде данде къеркьей гьабиялда хурхарал. Гьелда бан Россиялъул хиял буго коммерциялъулаб аслуялда ТIлибаналъе ярагъ бичун кьезе.