Крымтатаразул ATR абулеб телеканалалъул вукIарав редактор Роман Спиридонов ФСБ-ялъ суравалде ахIун вуго Крымалъул блокада гьабиялъул суалалда хурхун. Гьадин лъазабуна нижер радиоялъул «Крым.Реалии» абулеб сайталъе гьесул адвокат Джемиль Темишевас.
Дагьалъ цебе ФСБ-ялъ чIухь бана Спиридоновасулги гьесул эбел-инсулги рукъоб. Гьезухъа рахъун руго киналго электрониял алатал. Гьеб гуребги рукъоб батун бугин кьвагьулеб алат гьабиялъул мухIканаб инструкцияилан. Спиридоновас абулеб буго гьеб жинца цIунун букIараб инструкция гурин.