Швециялъул прокурор Кристер Петерссоница лъазабуна, 2012 соналъул февраль моцIалда Швециялда оппозиционер ва динияв хIаракатчи Обидхон Назаров чIвазе къасд гьабиялдда Узбекистаналъул тIадтаразул хурхен букIиналъе далилал ругин.
Гьев Назаров Узбекистаналдаса Швециялде лъутана 1998 соналда. Прокурор Петерссоница гьединго лъазабуна Швециялде Россиялдаса экстрадиция гьабун, вачун вугин Узбекистаналъул гражданин Юрий Жуковский. Шакъли буго хасго гьес Назаровасде гьужум гьабун букIиналда.