Россиялъул оппозиционияв политик Борис Немцов чанго таманчаялдасан кьвагьун чIван вукIине рес буго.
«Коммерсант» газетаялъ хъваралда рекъон, гьединаб хIукмуялде рачIун руго гьесие щварал ругъназул хал гьабулел рукIарал экспертал.
Гьез рикIкIунеб буго Немцовасде кьвагьун батизе рес бугин гьаракькъин бугеб таманчаялдасанги гьеб гьечIелдасанги. Ругънал батIи-батIиял рукIиналъул гIиллалъун букIине рес бугин батIи-батIияб къуват бугел гулби гьесде кьвагьун рукIингийин абулеб буго гьез.
Гьесде кьвагьулаго гьел чагIи кир рукIаралали чIезабизе кIун гьечIо экспертазда, щайгурелъул гьесул чорхода рукIарал ругънал гьесда ретIун букIараб ратIлида рукIаразде дандекколел гьечIолъиялъ.
Борис Немцов чIван вукIана Москваялда 27 февралалда. Гьеб хIужаялда бан жанив тIамун вуго щуго чи ва жеги кIигояв валагьулев вуго.