Рузман къоялъ лъагIел тIубана Малайзиялъул авиакомпаниялъул «Боинг» Донецкалъул сверухълъиялда бортаралдаса.
Гьелда бан чIегIер баялъул тадбирал 17 июлялда тIоритIана Украиналда, Австралиялда ва Нидерландабазда.
Жиндирго видео-хитIабалда Украиналъул президент Петр Порошенкоца гьадин абуна:
Петр Порошенко: «РекIелъ кIудияб гIагалигун абулеб буго дица, 298 чи рекIарав доб гражданияб боржароялде гурхIел гьечIеб террористикияб гьужум гьабун буго Россиялдехун руссарал сепаратистаз. Технологиялъул рахъалъан цIакъ цебетIураб ярагъ хIалтIизабун, «Боинг» бортизабун букIана.
Ва гьединаб ярагъ Россиялдаса гурони, тIокIаб кинабгIаги бакIалдаса гьанибе щвезе рес букIинчIо. Мадугьаллихъ бугеб улкаялъул тIадегIанаб политикияб ва рагъулаб тIалъиялъул амру гьечIебани, гьадинаб балагьги букIинароан».
Петр Порошенкоца гьединго абуна дунялалъул киналго эркенал улкабазул кумекалдалъун Крым Украиналде тIад буссинабизе бугин ва Украина ахир-къад цолъизе бугин. Малайзиялъул боржаро кьвагьизабуразе тамихI гьабизе бугин.