МагъчIваялъе рес

Избербаш: тухумчиялъул пардавалда нахъа...


Избербаш шагьаралъул нухмалъулев ИсламгIали БахIандов хъулухъалдаса нахъе ана гьеб шагьаралъул депутатазул данделъиялдаса хадув. Заманаялъ гьесул ишал тIуразарулев руго шагьаралъул администрациялъул бетIер Амир МухIамадовас.

3 июлалда ахIун букIараб гьеб депутатазул данделъиялда хIисабалде босараб лъабго суалалъул цояб букIана болжал щвелалдего шагьаралъул нухмалъи хIалтIи чIезаби. Депутатаз жеги чIезабун гьечIо цIияв нухмалъулев вищулеб къо. Гьелда тIад конкурсалъул комиссия хIалтIизе бугин бицана ЭР-лъе депутат Муртазаев ГIалибегица. Амма гьеб бакI цеве вукIарав нухмалъулев ГIабдулмажид Сулеймановасе хIадурулеб бугин бицен буго. Гьелда ва гьанже вукIарав мэр нахъе иналда бан гьадин бицана ГIалибег Муртазаевас.

ГIалибег Муртазаев: «ИсламгIали БахIамадовас лъазабуна жив пенсиялъул ригьалдеги вахун вугин, гьединлъидал цодагьаб бигьаяб хIалтIуде ине къваригIун бугилан. Хадуб депутатазе баркалаги кьуна. Сулейманов тIадвуссунев вугилан гьел нужеца рицунел жал гьадингосел харбал руго. Лъида лъалеб щиб ккелебали. Жеги конкурсалъул комиссияги бакIаризе ккола, гьез гьабиларищ кинабго. Хадуб газеталдасан лъазабила гьез киналъулго хIакъалъулъ».

Кин батаниги, церегоялдаса нахъе рагIизе бегьула республикаялда харбал Избербашалъул нухмалъиялде ГIабдулмажид Сулейманов вачIунев вугин абурал. Гьев гьабсагIаталда шагьаралъул депутат ккола. Избербашалъул мэрлъиялдаса гьев вахъун вукIана гьесул вац МухIамад Сулейманов МахIачхъалаялъул нухмалъиялде тIамидал, кIиго вац кIиго шагьаралъул мэрлъун вукIине бегьуларилан.

Гьанже МухIамад Сулеймановги унев вугин бицен буго. Масала, республикаялъул тIалъиялдаса ЭР-хъе щварал баяназда рекъон, гьес гIарзаялда гъоркь гъулбасун буго I0 июлалда МахIачхъалаялъул нухмалъиялдаса ине. Гьесиеги гьанжелъагIан живго вукIараб ФОМС абураб гIуцIиялъул нухмалъи кьолеб бугилан бицен буго.

Амма жибго гьеб идараялъул вакилзабазул ракIчIей гьечIо Сулейманов жидехъе вачIине вукIиналда. Политикаялда хадуб хал ккурал чагIазул цо-цоязги рикIкIунеб буго республикаялъул бетIер Рамазан ГIабдулатIиповас гьедин бигьаго МухIамад Сулеймановасе ФОМС гIадаб бечедаб гIуцIи кьеларилан. Щайин абуни МахIачхъалаялъул мэрлъиялдаса нахъеги вахъун унев чиясухъе кодобе гьединаб къуват кьезе рес гьечIила, республикаялъул тIалъиялда ццим букIинарищдила гьесул.

Гьединлъидал гьев тIадеги щулалъизе бегьулила тахида. Гьелда тIаде вацги Избербашалъул мэрлъун тIамуни, тIубан жиндаго ракIчIезе бегьулила МухIамад Сулеймановасул. Амма МахIачхъалаялъул нухмалъулесдаги республикаялъул тIалъиялдаги гьоркьоб дагIба ккедал, МухIамад Сулейманов нахъе инарин чIараб заманалда бицунеб букIана жиндие ФОМСги, вацасе Избербашги кьейин тIалаб гьабулеб бугила гьес тIалъиялдаса.

10 июлалда нахъе ине вугин харбал ругониги, МухIамад Сулеймановас тахшагьаралъул официалияб сайталдасан гьабураб лъазаби гьечIо жеги. Амма ЭР-лъе тахшагьаралъул администрациялдасан щварал баяназда рекъон, 9 июлалда тIамизе вуго Сулейманов ФОМСалъул нухмалъулевлъун. Гьев жидер нухмалъулевлъун вукIине вугин ФОМСалъул хIалтIухъабазе лъазаби хIукуматалъул вице-премьер Анатолий Карибовасги гьабизе буго.

Республикаялъул тIалъиялъ лъазабуна Сулейманов МахIачхъалаялъл нухмалъяилда тун бажаруларин, гьесдаса божилъи хванилан. Гьесде гIунтIизарулел гIайибазул цояб ккола шагьаралда церего гIадин изну гьечIого гIемертIалаял минаби ралел рукIин. Амма дагьалъ цебе гьабураб лъазабиялда живго мухIамад Сулеймановас абуна жив вачIараладса МахIачхъалаялда ракьул цониги кесекги бичичIин, бичизе ракьги хутIун букIинчIин гьениб.

Комментариял (1)

Гьаб форум къан буго
XS
SM
MD
LG