Итни къоялдаса нахъе Дербенталъул жанисел ишазул бутIаялъул нухмалъулев Левадин Аваев хIалтIудаса нахъе реххун вугин абурал баянал щвана «Эркенлъи» радиоялъухъе гьесда цадахъ хIалтIулездасан. Аваев хъулухъалдаса вахъизе хIукму гьабун букIиналъул бицун буго Дагъистаналъул жанисел ишазул министерлъиялъул данделъиялда.
Гьев хIалтIудаса нахъе витIиялъе аслияб гIиллалъун ккун буго Аваевасда тIад гьабун букIараб такъсиргьабиялъул иш диваналде кьун букIин.
РакIалде щвезабилин Дербенталъул полициялъул кIудиясда тIад гьес хъулухъалдаса букIине кколелдаса цIикIкIун пайда босун бугин абун такъсиргьабиялъул иш рагьун букIана исана апрель моцIалда.
Гьеб иш рагьиялъе гIиллалъунги ккун буго Аваевас жиндаго цадахъ хIалтIулев полициялъул майор Тельман Ибрагьимов вухи. «Эркенлъи» радиоялъ бицун букIахъе гьел кIиялго полициялъулазда гьоркьоб дагIба ккун буго къануналде данде кколаредухъ валютаялъул бича-хиси гьабулел чагIазул ишалъе гIоло.
Гьедин Аваев Левадиница Ибрагьимов Тельман ахIун вуго жиндихъего гьел чагIи кинаб административияб тамихIалде цIазе бегьулелилан цIехезе. Ибрагьимов вукIун вуго административиял такъсирал гьаруразе тамихI гьабиялда хадуб халкколеб полициялъул бутIаялъул нухмалъулев.
2009 соналдаса нахъе къануналда гьеб валюта бича-хисиялда хурхун тамихI бихьизабураб бутIа хвезабун бугин гьел тамихIалде цойги кинал бутIабазда рекъон цIазе бегьулебали лъазабилин абун буго Ибрагьимовас.
Гьел рагIабаздаса разигьечIолъи бихьизабизе лъугьун вуго Аваев. Хадуб гьеб суалги мухIкан гьабун жиндир хIалтIухъан гьесде кIалъараб мехалда Аваев гьесде ахIдон хъубал жал рикIкIине лъугьанилан хъвалеб буго Ибрагьимов Тельманица.
Гьеб хIехьезе кIвечIого гьесда бадирчIваял гьаризе арав Ибрагьимовасда Аваевас ботIролъ жо кьабун буго гьев майорасул гIадалнахуе жагъаллъи ккелеб хIалалъ.
Цебехун рехсараб республикаялъул жанисел ишазул министерлъиялъул данделъиялда Левадин Аваев цIакъ каканин, гьес нухмалъи гьабулеб полициялъул бутIаялдаги гIемерал гIайибал чIванин бицана «Эркенлъи» радиоялъе гьеб тадбиралъул гIахьалчи Сефер Султановас.
Сефер Султанов: «Аваев цIакъ гьекъолин, хIалтIудаги гьекъон вукIунев вугин абун вагъулев вукIана гьесде республикаялъул жанисел ишазул министерлъиялъул вакил.
ЛъагIалица Дербенталда ккарал такъсиразул I5 процент гурони рагьун гьечIин, гьеб кутакалдан квешаб хIалтIул хIасилал кколин абун ахIи бана Аваевасде. Гьединго хIалтIулеб бакIалда гIадлу хвезабулин, министерлъиялъул хIалтIухъаби рачIараб мехалда гъоркьанратIлилъ дандчIвалил гьел.
Гьелда тIадеги шагьаралъул нухмалъигун рекъон батIи-батIиял гIарцул хIилла-рекIкI гьабулеб букIиналда щаклъи бугин гьесдайилан абуна гьеб данделъиялда.
Гьединго гьеб шагьаралъул нухмалъуда ругезул ва гьезул гIагарал чагIазул къануналде данде кколареб хIалалъ гьабулеб бугеб даран-базаралъеги щибго квалквал гьабичIого, санагIалъалаби гьарулел рукIун руго гьес. ЦохIониги идараялъул гьездехун киналгIаги суалал рукIунарел хIал гьабун букIун буго гьес».
Аваевас вухарав Ибрагьимов Тельманил адвокат СегIид Къурбановас рикIкIунеб буго хIалтIуда гIемер гIада-гIадалал жал гьарун Дагъистаналъул жанисел ишазул министерлъиялда жидедаго чIалгIун вугила гьев Аваев. Гьедин букIинчIебани киданиги гьез жидерго системаялъул чиясде гIайиб щвезе толароанила.
СегIид Курбанов: «БетIералда гьеб такъсиргьабиялъул иш рагьизеги, экспертизаби гьаризеги, цойги дица тIоритIизе тIалаб гьабулел рукIарал тадбиралги тIоритIиларин абун нахъчIвалел рукIан цIех-рехчагIаз. МагIна гьечIел кьучI, гьечIел багьанабиги ратулел рукIана гьез.
Хадуб дида бичIчIараб бакIалдаса гIебеде гьев Аваевасдасан цIакъго гIемер гIарзал рачIине лъугьун руго. Цере –цере гьес кьабарал, хъубал жал абун инжит гьарурал гIадамалги хъвадарун руго министрасухъе. Гьеб гурониги киназдаго лъала гьев гьекъолеб куцги, гьесул букIунеб чорокаб вукIа-вахъинги.
Гьеб кинабго чIалгIун батилаха нухмалъиялдаги. Гьединлъидал такъсиргьабиялъул иш рагьун хадуб гьеб диваналде щвезабиялъе квалквал гьаричIо гьез. Гьединлъидал гьадин къокъаб заманалда жаниб рагIалде бахъараб гьеб иш».
Ахираб кIиго соналда жаниб Дагъистаналда хIалтIудаса вахъарав лъабабилев полициялъул нухамалъулев кколев вуго Левадин Аваев. Гьесдаса цеве хIалтIул гIадлу хвезабиялъухъ ва гьереси дипломалда рекъон хIалтIуде лъугьун вукIиналъухъ хъулухъ тезабуна Гумбет мухъалъул жанисел ишазул бутIаялъул нухмалъулев.
2013 соналъ МахIачхъалаялъул полициялъул хIалтIухъаби кваналеб бакIалда ккараб дагIба-къецалъе гIоло цоцаде кьвагьдон рукIана. Гьеб ишалъе гIоло гьел жалгоги гьезул нухмалъулев, ай МахIачхъалаялъул полициялъул бутIаялъул бетIер ИсмагIилов МухIамадги цойги чанго гьесда цадахъ хIалтIулевги хIалтIудаса нахъе реххун рукIана. Гьез букIине кколеб хIалтIи гьабулеб гьечIин абун буго министерлъиялъул вакилзабаз.
