Кувейталъул Жанисел ишазул министерлъиялъ чIезабун буго, рузман къоялда шиитазул мажгиталда жанив живго къвагьизавурав чи Фахд Сулейман ГIабдулмохсен аль-Кабаа цIар бугев СагIудиязул ГIарабиялъул гражданав вукIин. 26 июналда теракт гьабилелда чанго сагIаталъ цеве гьев щун вуго Кувейталъул аэропорталде.
Гьеб тIадекIанцIиялъул къурбанлъун вахъана 27 чи, лъукъана 220-ялдасаги цIикIкIун.
ТIадекIанцIиялъул жавабчилъи жиндего тIаде босана "Исламияб пачалихъ" гIуцIиялъ.