Молдоваялъул премьер-министр Кирилл Габуричица рузман къоялда лъазабуна хъулухъалдаса нахъе унев вукIиналъул хIакъалъулъ. Министразул кабинеталъул нухмалъи гьес гьабулеб гьечIо нусгоялдаса дагьалъ цIикIкIун къояз гурони.
Араб анкьалда Генералияб прокуратураялъ премьерасул гьикъа-бакъи гьабуна гьесул тIадагIанаб лъай щвеялъул диплом гьересияб бугин абураб ишалда хурхун.
Габуричица рикIкIунеб буго гьеб хIужжа хурхараб букIине бегьулин жинца нухмалъиялда ругел партиязде Молдовалъул генпрокурор ва Миллияб банкалъулги Финансазул базаралъул миллияб комиссиялъулги бутIрул хъулухъалдаса нахъе рахъи тIалаб гьабураб хитIабалдайин.
Премьерасул пикруялда, гьел хъулухъчагIаз гIураб кIвар кьун гьечIо улкаялъул аслияб лъабго банкалдаса цо миллиард доллар къватIибе биччангутIиялъе.