«Династия» абураб рахIмуялъул фонд гIуцIарав Дмитрий Зиминица тун буго Россия. Гьелъул хIакъалъулъ лъазабулеб буго РБК абураб сайталъ. Кинаб улкаялде гьев аравали, лъазабулеб гьечIо. Жиндирго фондалъул хIалтIи чIезабиялъул хIукму Зиминица гьабун буго 25 маялда Юстициялъул министерлъиялъ гьесул фонд «къватIисел улкабузул агентазул» сияхIалде босун хадуб. Министерлъиялъул хIукму какана инсанасул ихтиярал цIунулез ва жамгIиял хIаракатчагIаз. 6 июналда Москваялда тIобитIизе планалда буго «Династия» фондалъул рахъ ккураб митинг.
Рузман къоялъ бачIараб лъазабиялда рекъон, ЖамгIияб палатаялъул гIахьалчи Георгий Федоровас Минюст ахIулеб буго Горбачевасул фонд «къватIисел улкабазул агентазул» сияхIалде босиялъул къварагIелалда сверун цIех-рехх гьабиялде.