«ГIазаб кьеялде данде комитеталъул» мобилияб къокъаялъул офисалде тIадекIанцIи гьабиялъул щаклъи бугев 40-ялдаса цIикIкIун чи ккун вуго Грозныялда.
Гьелъул хIакъалъулъ «Мемориал» абураб инсанасул ихтиярал цIунулеб централъул вакиласда лъазабун буго чачаназул цIех-реххалъул идараялъ. Амма «Мемориалалъ» лъазабулеб буго, ккуразул цогIаги чи лъиданиги вихьун гьечIин.
АрбагI къоялда радал Грозныялда гьеб «ГIазаб кьеялде данде комитеталъул» офисалъул гордазда гъоркь байбихьун буго Ставрополь регионалда Джамбулат Дадаев чIваялде данде протесталъул акция.
Данде ракIарараз ахIиял гьарулел рукIун руго инсанасул ихтиярал цIунулел какун.
Хадуб маскаби хурал гIолохъабаз кьаби щвезабун буго идараялъул автомобилалда. Гьелда хадуб гьел офисалде жаниреги ун, гьениб кинабго жо хвезабун буго.
Комитеталъул хIалтIухъаби лъутизе ккун руго гордухъан. Гьеб кинабго лъугьа-бахъун буго кинаб гIаги хIаракатчилъи гьечIого чIарал полициялъулазда цебе.
«ГIазаб кьеялде данде комитеталъул» бетIер Игорь Каляпиница лъазабулеб буго, Грозныялда бугеб жидер гIуцIиялъул вакиллъи къазе ккезе бугин.