Москваялъул бутIрул разилъун руго «Династия» абураб «къватIисел пачалихъазул агентазул» сияхIалде босараб рахIмуялъул фондалъул рахъ ккураб митинг тIобитIиялъе изну кьезе.
Гьелъул хIакъалъулъ лъазабуна регионалияб хIинкъигьечIолъиялъул тахшагьаралъул департаменталъул бетIер Василий Олейникица. Акция тIобитIизе кколеб рагIула 6 июналда Суворовасул майданалда.
Гьелда гIахьаллъизе бегьула кIиазаргоялде гIунтIун чи. «Династия» абураб фондалъ квербакъи гьабулеб буго лъай кьеялъул, гIелмиял ва цогидал проектал гIумруялде рахъинариялъе.
«КъватIисел аулкабазул агентазул» сияхIалде гьеб фонд босун буго 25 маялда.