«АхIмад Къадировасул фонд» ккола Россиялда бищунго баянлъи гьечIеб коммерциялаб гуреб гIуцIи. Киссан гьенибе гIарац бачIунебали, информалатазда бицунеб гьечIин, хъвалеб буго «Коммерсант» газеталъ.
Чачан республикаялъул коммерциялъулал структурабазул аслияб къадар бугин гьеб фондалъул контролалда гъоркь. Гьелда хурхарал компанияби кидаго гIадин бергьунин тендеразул къецазда ва гьезие щолин пачалихъиял тIадкъаялин, хъвалеб уго макъалаялда. «Коммерсанталъул» баяназда рекъон, пайдаялъул цогидаб канал кколеб буго бюджеталъул гIуцIабазул хIалтIухъабаз кьолеб гIарац. Гьез гьеб фондалде битIулеб буго жидерго пайдаялдаса I0 процент. Гьеб тIадаблъун бихьизабун буго, гьеб жидеего бокьун гьабулеб галилъун лъазабулеб букIаниги. Мисалалъе, бюджеталъул хIалтIухъабазда щибаб моцIалъ босизабулеб рагIула Къадировасул каламал данде ракIарарал тахьал.
Формалияб къагIидаялда фонд ккола коммерциялъулаб гуреб гIуцIи. Амма Минюсталъ гьелъул хIаракатчилъиялда хадуб хал кколеб гьечIо.
Газеталъ гьеб гIуцIиялъул баяназул базаялда гьелъул хIакъалъулъ информация гьечIолъиялде кIвар буссинабун хадуб , Минюсталъул вакильзабаз абун буго, гьеб информация бахъулин чачаназул информалатазда.
Transparency International гIуцIиялъул лъазабиялда рекъон, гьеб кколеб буго къануналде данде кколареб къагIида ва Къадировасул фондалдаги тIадаб буго жиндирго хIаракатчилъиялъул хIакъалъулъ информация федералиял идарабазухъе битIизе.