Ракълилаб заманалда хварал солдатазда тIаса миноборонаялъул информация балъгояблъун букIине кколин Владимир Путиница гъулбасараб къанун Пачалихъияб балъголъиялъул къануналде дандекколарин рикIкIунеб буго инсанасул ихтиярал цIунулез.
«Команда 29» абураб багъа-бачариялдаса адвокат Иван Павловас цIияб къануналда тIаса гIарза битIана диваналде. Гьес рикIкIунеб буго гьеб къанун ургъунго гъулбасанин Путиница. Украиналда унеб рагъулаб конфликталда чIварал Россиялдаса солдатазул хIакъалъулъ информация къватIибе биччазе бокьун гьечIин Кремлалъе илан абулеб буго адвокатас.
Гьединго гьес рикIкIунеб гьеб къануналдаса бичIчIулеб бугин Россиялъул казармазда хварал солдатазул хIакъалъулъги бицине бегьулареблъи.
ТIадежоялъе, цIияб къануналъ квал-квал гьабулеб буго журналистазул хIалтIуеги. ЧIварал солдатазул хIакъалъулъ бакIарараб информация тIатинабуни, гьел туснахъ гьаризе бегьула анкьго соналъ.
Россиялъул президентасул пресс-секретарь Дмитрий Песковас абуна Украиналда хварал Россиялъул солдатазда тIаса бугеб информациялда дандечIеялъе гъулбасараб къанун гурин гьеб. Гьес абуна Пачалахъияб балъголъиялъул къанун лъикIлъизабизе ургъанин цIияб къанун.
Прессаялъни чанги нухалда лъазабун букIанаан Россиялъул рагъулаз Украиналъул сепаратистазе кумек гьабулеб бугилан, амма улкаялъул президент Путиница гьел информациязда бугьтаналин абулаан, гьереси бугилан чIолаан.