Футболалъул халкъазда гьоркьосеб федерациялъул ай ФИФАялъул хIакимазда тIад такъсир гьабиялъул иш рагьана Швейцариялъул генпрокуратураялъ. Жидерго хъулухъалдаса цIикIкIкун пайда боси ва ришватчилъи – гьел такъсирал гьарун ратизе бегьулин ФИФАялъул хIакимазилан, лъазабулеб буго низам цIунулез.
2018-леб ва 2022-леб соназда тIоритIине ругел футболалъул чемпионатал гьаризесел улкаби рищулеб мехалда гьез гьарунин рехсарал такъсиралин, рикIкIунеб буго прокуратураялъ. Гьел соназда Россиялда ва Катаралда тIоритIине кколаан чемпионатал.
The New York Times газеталъ хъвавухъе, ФИФАялъул ичIго хIаким ккуна низам цIунулез. Цогидал информалатазул баяназда рекъон, такъсир гьабиялъул иш рагьизе рагIула 14 хIакимасда тIад. Ункъо хIаким цIех-рех чагIигун хIалтIизе разилъанин хъвалеб буго прессаялъ.