ГIорхъаби къана 25 маялда. Осетиялъул Пачалихъияб хIинкъи гьечIолъиялъул комитеталда ай КГБялда абухъе, гьезухъ информация буго Грузиялдаса диверсантал рачIине бегьулин республикаялда ахIвал-хIал хIалуцинабизе.
Провокациял гьаризе бегьула Грузиялъул цеве вукIарав президент Михил Саакашвилил рахъкколезин хъван буго Югалъулаб Осетиялъул КГБялъул пресс-релизалда.
ГIорхъаби кида рагьизе ругелали мухIканлъиязабулеб гьечIо КГБялъ, абулеб буго ахIвал-хIал парахалъараб мехалда рагьилин.
Гьеб лъазабиялда тIаса Грузиялъул нухмалъиялдаса жеги баянал рукIинчIо.