МагъчIваялъе рес

Гъизляралъул коньякалъул цIияв хважаин


Гъизляр. Коньяк гьабулеб заводалъул кIалтIа.

Дагъистаналда бугеб Гъизляралъул чагъир хIадур гьарулеб завод унеб буго «Росспиртпром» абураб гIуцIиялъул къайимлъиялде гъоркье. Чанго моцIалъ цебе лъазабун букIана завод федералияб буголъиялде кьолеб бугилан. Гьеб хиса-басиялъ щиб кьезе бугеб заводалъул хIалтIуе ва Дагъистаналъул хIукуматалъе кинаб зарал гьелдалъун ккараб абурал суалазе жаваб кьолеб буго экономист Михаил Чернышовас.

Гъизляралъул коньяк хIадур гьабулеб заводалъул приватизация гьабизе букIиналъул хабар баккаралдаса гIемераб ахIи-хIур бахъун букIана араб соналъ. Приватизация гьабизе букIиналъул лъазабун букIана республикаялъул нухмалъулев Рамазан ГIабдулатIиповас.

Гьелъул пайда букIине бугин республикаялъул экономикаялъеян абуна гьес. Амма гьеб заводалъул хIалтIухъабаз дандечIей лъазабуна гьеб хIукмуялда. Гьеб заводалда хIалтIун бетIербахъарал чагIи ругин шагьаралъул бащадабниги халкъ, гьанже гьебги чияца босун жидеца кисайин хинкI балагьизе бугебилан, чанго нухалъ митингалги тIоритIана гьез.

ХIасил-калам заводалъул приватизация гьабичIого, гьеб респбуликаялъухъаги босун кьуна федералияб буголъиялъухъе. Пачалихъиябгун унитарияб предприятие абураб даражаги хисизабун гьанже гьелъул гьабизе рагIула акциячагIазул гIуцIи ва «Росспиртпром» абураб гIуцIиялде гъорлъе ун букIине бегьулин Гъизляралъул заводилан абураб информация бачIана 19 маялда къватIибе.

Гьелдалъун заводалъул бренд хисизе гьечIин, гьеб цебе букIарабго гIадин, Дагъистаналъул коньяк хIадур гьабулеб заводлъун хутIизе бугин лъазабуна, Россиялъул алкоголалъул иш тIад къараб идараялъ. Гьединабго пикру «Эркенлъи» радиоялъе бицана экономист Михаил Чернышовасги.

Киназдаго лъалин Гъизляралъул коньяк хIадур гьабулеб заводалъул респбуликаялъул нухмалъигун дандеккунгутIиял рукIараблъи. Гьединлъидал тIадчагIигун кьалда букIинегIан заводалъеги чIара-хьараб куцалда хIалтIи рес кьолеб Россиялъул гIуцIилъунго лъикIилан абулеб буго гьес.

Амма батIияб суал бугин гьениб Дагъистаналъул хIукуматалъе ккезехъин бугеб зарал. «Росспиртпром» гIуцIиялъул къайимлъиялде Гъизляралъул завод ккани, Дагъистаналъул экномика махIрумлъизе бугин чанго миллион гъуршил хайиралдасаян рикIкIунеб буго экономистас.

Михаил Чернышов: «Жиндир заманалда Гъизляралъул коньяк гьабулеб заводалъ Дагъистаналъул эконмикаялъе кьолаан 500 миллион гъурущ хайиралъул. Республикаялъул бюджеталде федералияб бюджеталдаса 26 миллиард гъурущ щолеб букIин хIисабалде босани, Дагъистаналъе гьеб 500 миллион гъурущ ккола цIакъ кIудияб гIарац, гьединлъидал республика махIрумлъана экономикаялъе хайир кьолеб букIараб цо къуватаб ресурсалдаса.

Гьеб цо. КIиабизе бугони гьеб Гъизляралъул заводалъул приватизациялъул бицунаго, араб соналъ республикаялъул нухмалъиялъ бицунеб букIана гьелъ кьезе бугеб хайиралъул. Чанго батIияб багьа рехсолеб букIана гьеб бичани щвезе бугеб, кIиго миллиардалдаса бахъараб ункъоялде щвезегIан.

Амма кингоги завод ккана федералияб буголъилъун. Респбуликаялъул буголъиялдаса федералияб буголъиялде кинаб букIаниги магIишаталъул идара унеб мехалда гьелъул квешаб хIасил камуларо. Къокъ гьабун абуни жиндие лъикIаб хайир кьолеб букIараб жоялдса махIрумлъана Дагъистаналъул хIукумат.

ГIемерисезул гьединго баккулеб суал буго гьеб заводалъ къватIибе биччалеб коньякалъул къисмат кинаб букIине бугебилан абурабги. Россиялъул цIикIкIарал шагьаразда «Гъизляралъул коньяк» абун кIудияб машгьурлъиги щвараб, гьез цIакъ къиматги гьабулеб нигIмат ккола гьеб.

Гьалдаса хадуб лъил коньякиланин гьелде абизе бугебилан абураб суал баккулеб буго халкъалъул. Гьениб кIудияб хиса-баси ккезе гьечIилан абуна гьелъул хIакъалъулъги Михаил Чернышовас.

Михаил Чернышов «Цебе гьеб букIун батани Дагъистаналъул предприятие, гьанже гьеб букIине буго Россиялъул предприятиелъун. Имиджалъе цо дагьабго асар гьабун батизе бегьулаха гьелъ, амма къватIибе бичалеб нигIматалъе щибниги хис-баси ккезе гьечIо, гIицIго этикеткаялда тIад гьабураб хъвай-хъвагIай гурони».

Гъизляралъул коньяк гьабулеб завод Дагъистаналда рагьун буго I885 соналъ. Гьелъул аслияб брендаллъун ккола «Дагестан", "Кизляр", "Лезгинка", "Багратион" абурал коньяказул тайпаби. 2013 соналъ заводалъе щун буго 2,5 млрд. гъурущ гIарцул, гьелда гьоркьосан бацIцIадаб хайирин абуни букIун буго 347 миллион гъурущ.

XS
SM
MD
LG