Россиялъул инсанасул ихтиярал цIунулез квешаб къимат кьуна Ножаюрт мухъалъул полициялъул бетIер, батIи-батIия информациялда рекъон, 46 яги 57 сон барав Нажуд Гочиговасулги 17 сон барай Луиза (Хеда) Гойлабиевалъулги ригьиналъе.
«Интерфакс» агентлъиялъе комментариял гьарулаго, «Гражданское содействие» абураб инснасул ихтиярал цIунулеб комитеталъул бетIер Светлана Ганнушкиналъ абун буго, жиндани 2I гIасруялда Европаялда гьединаб жо букIиналъул хIужаго кколин гIажаибаб жойин.
Ганнушкиналъул рагIабазда, бахIарасул лъадиги лъимерги бугин абураб информациялъул хал гьабизе ккола. Россиялъул къануназда рекъон, гьукъараб буго кIиго яги цIикIкIун лъади ячине. Цингигийин, жубалеб буго гьелъ, балугълъиялде яхинчIей ясалъулгун ригьинги гьединго данде кколарин къануназдейин.
«Инсаназул ихтияразухъ» абураб багъа-башариялъул лидер Лев Пономаревас загьир гьабураб пикруялда рекъон, балугълъиялде яхинчIей яс россасе кьеялда нахъ букIине бегьула гьелдеги гьелъул эбел-инсудеги тIадецуй гьабулеб букIиналъул хIасил.
Чачан республикаялъул бетIер Рамзан Къадировас рузман къоялда «Инстаграммалда» хъвана, Гучиговасулги Гойлабиевалъулги ригьиналъул официалияб регистрация тIобитIизе бугин 16 маялдайин.