Сочиялда аскIоб бугеб «Бочаров ручей» абураб резиденциялда тIоритIана Россиялъул президент Владимир Путинилги Цолъарал Штатазул пачалихъияв секретарь Джон Керрилги гара-чIвари. Гьелда гIахьаллъана Керрилгун кIалъа-басаял гьелда цебе тIоритIарав Россиялъул къватIисел ишазул министр Сергей Лавровги.
Америкаялъул делегациялда гъорлъ рукIана политикиял суалазул рахъалъан пачалихъияв секретарасул кумекчи Уэнди Шерман ва Россиялда Цолъарал штатазул вакил Джон Теффт. Цебе лъазабухъего, рахъаз гьоркьор лъуна Украиналдаги, Сириялдаги, Йеменладги бугеб ахIвал-хIалалъулги цогидалги суалал.