МагъчIваялъе рес

Москваялъул мэриялъ инкар гьабуна Борис Немцовасул цIар гьев чIвараб кьоялъе кьезе


Москваялъул мэриялъ инкар гьабуна оппозицияв политик Борис Немцовасул цIар гьев чIвараб кьоялъе кьезе.

Гьединаб цебелъей загьир гьабун букIана Пачалихъияб Думаялъул депутат Геннадий Гудковас. Гьесул цебелъеялда букIана гьединго Москваялъул кьватIалъе Немцовасул цIар кьейги ва мемориалияб хъарщи чIвайги.

Москваялъул нухмалъиялъул жавабалда абулеб буго, къануналда рекъон, машгьурал гIадамазул цIарал кьезе бегьуларин гьел хун гIицIго анцIго соналдаса хадуб гурониян.

Мэриялъул жавабалъе комментариял гьарулаго Гудковас лъазабун буго, жинда лъалин къануназ гьеб гьукъулеб букIинин, амма гьев чIвай кколин къануназдаса рорчIарал форс-мажоралъул лъугьа-бахъинин.

Оппозицияв политик Борис Немцов чIвана 27 февралалда Москворецкалъул КIудияб кьода. Гьесул рахъ ккураз гьеб кьода гIуцIана халкъияб мемориал ва гьениб чIвана «Немцов мост» абураб хъарщи.

XS
SM
MD
LG