МагъчIваялъе рес

Гьури сабаблъун щвечIел компенсациял...


МахIачхъалаялъул ГIахъущиясул къотIноб бугеб гIемертIалаяб минаялда цIа ккаралдаса хадуб моцI ана, амма зарал ккарал гIадамазе кинабгIаги кумек щун гьечIо пачалихъиял идарабазухъа.

Гьеб лъугьа-бахъиналда щивго хвечIо ва лъукъичIо, амма гIадамаз жаниб гIумру гьабун рукIарал анцIго рукъ тIубанго бухIана. Зарал ккана цогидал рукъзазул хважанизабазеги – лъим бачIунеб пластикадул трубал рухIана, газ бачIунеб система ххвана, токалъул кварал рухIана. Жакъа къоялда гIемертIалаяб минаялда лъицаниги гIумру гьабулеб гьечIо. Гьел рукъзабазда гIумру гьабун рукIарал гIагарлъиялъухъ руго.

Гьезул гIарзаби руго жидее шагьаралъул коммуналиял хъулухъаз кинабгIаги кумек гьабичIин. Зарал ккарал рукъзазул хважаизабини щиб, рухIарал рукъзазул хважаинзабазе компенсациял щвезехъин гьечIо. Шагьаралъул администрациялъ лъазабухъе, гIемертIалаяб минадул цохIо тIох къачIаялъе къваригIун буго 16 миллион гъурущ. Амма мэриялда гьединго абуна шагьаралъул бюджеталда гьеб гIарац гьечIин.

Минаялда гIумру гьабун рукIарал гIадамазул къукъа гьал къоязда мэриялде рачIана. Амма гьелгун щалниги дандчIвачIо. Ленинил майданалда ракIарарал гIадамаз журналистазе бицана, цIа ккун хадуб минаялда сверухъ ва жаниб хутIараб рищни жидецаго бакIаранин ва тIох бацIиналъул хIалтIабиги жидецаго гьарунин. «Амма гьел хIалтIаби мэриялъул вакилаз рикIкIунел руго жидеца гьарураллъун. Кагътазе гьез жавабалги кьолел гьечIо», - ян гIарзаби ругоан гIадамазул.

Гьез гьединго бицана жал гостиницабазде щвезаризе кколел рукIанин Киров мухъалъул администрациялъ, амма гьел шартIалги жидее чIезаричIин.

Киров мухъалъул администрациялда абулеб буго жидеца кумек гьабунин – рищни нахъбаччизе машинал рихьизарунин. Амма гIадамазул рагIабазда рекъон, гьел машинабазухъ гIарац минаялда гIумру гьабулез кьуна. Рищнидул цIураб 38 КамАЗ букIана ва жиб-жиб машинадухъ I500 гъурущ кьезе кканилан, бицана гIадамаз.

Гьединго гьезул рагIабазда рекъон, МЧСалда гьезда абун буго пачалихъиял компенсациял гьезие рихьизарун гьечIин. Къануналда рекъон, тIабигIияб стихиялдаса зарал ккаразе компенсациял кьеялъе рихьизарурал шартIал руго. Минаялда ккараб цIа гьороца тIибитIизабуралъун рикIкIунеб буго. ЦIа ккараб къоялда гьорол хехлъи секундаялда жаниб 28 метралъулаб букIана, амма компенсациял кьола секундаялда жаниб 30 метр хехлъи бугеб гьуриялдаса зарал ккаразе.

Шагьаралъул администрациялдаса вакилаз къабул гьаричIо гIадамал. Амма гьелгун дандчIвана Дагъистаналъул нухмалъулесул хасав вакил ГIалибег ГIалиев.

ГIадамазул масъалаялда тIаса МЧСалъул позиция жинда бичIчIулеб гьечIилан абуна ГIалиевас «Эркенлъиялъе».

ГIалибег ГIалиев: «Доб къоялда радалиса МЧСалъ ритIулел рукIана СМСал ураганалъулаб гьури букIине бугин. Гьуриялдаса гIадамазе кIудияб заралги ккана, шагьаралъул чанги бутIаялда канлъиги букIинчIо чанги къоялда. Вице-премьер Рамазан Жафаровгун дандчIвана гIадамал. Гьеб минаялде хасаб инспекция битIизе къотIи гьабуна. ГIадамазул киналго суалал тIуразегIан дица гьелгун бухьен кквезе буго».

Вице-премьергун дандчIараз бицухъе, Жафаровас абун рагIула МЧСалъул баянал гьересияллъун рукIине рес гьечIин ва гьелдалъун республикаялъул резервияб фондалдаса компенсациял гIадамазе кьезе ихтияр гьечIин. Амма хIакимас масъала тIубазе цогидал нухал ралагьизе ругин рагIи кьун буго.

ГIадамазул хьул буго кинаб букIаниги кумек жидее гьабилин хIукуматалъ. Гьеб минаялда жаниб гIумру гьабулеб буго гIемерисала гIолохъанал хъизаназ ва жидерго сурсатаздалъун ремонталъул хIалтIаби гьаризе гьезул рес гьечIо.

XS
SM
MD
LG