МагъчIваялъе рес

Мемориал: Аскарияз Временныялда гIадамазул ихтиярал хвезаруна


«Мемориал» абулеб инсанасул ихтиярал цIунулеб къокъаялда ракIалда буго Буйнакскиялъул цIех-рехалъул комитеталдаса бачIараб гIарзаялда дагIба базе.

Гьеб буго Унсоколо мухъалъул Временное росулъ низам цIунулез гIадамазул ихтиярал хвезариялда хурхараб гIарза.

Гъоркьисала аскарияз чанго моцIалъ хасаб операцияги тIобитIун, гьанже Временное росу тIубан чIунтун буго. ГIадамаз росу тун буго. Хасаб операция лъугIун хадуб гIуцIараб комиссиялъ чIезабун букIана гIадамазул 52 мина бугин жаниб яшав гьабизе бажарулареб.

Гьедин инсанасул ихтиярал цIунулез рикIкIунеб буго аскарияз гьеб росдал гIадамазул ихтиярал хвезарунин. Амма аскарияз жаваб кьола жидеца гьенир тIагIинарунин изну гьечIого яргъид гIуцIарал гIадамал, гьедин жал хIалтIанин гIадамазул гIумру парахат букIиналъул мурадалда.

БукIаниги, «Мемориал» къокъаялъ тIалаб гьабизехъин буго гьел аскариязул ишал такъсириял рукIанилан хIукму къотIизабизе. Амма Буйнакск мухъалъул цIех-рехчагIаз гьезухъе бачIун буго жидее инкар гьабураб кагъат.

«Мемориалалъул» Дагъистаналда вугев вакил Сиражудин МухIамадовас ЭР-ялъе тасдикъ гьабуна жидеца кватIичIого низам цIунулезе хитIаб гьабизе букIинги, Временное росулъ хасаб операция тIобитIи цIех-рехалъул идарабаз гIадатияб ишлъун къабул гьабулеб букIинги.

Сиражудин МухIамадов: «Низам цIунулезда гьеб ишалъулъ кинабгIаги такъсир бихьулеб гьечIо. Гьединаб жаваб бачIана нижехъе Буйнакскиялдаса, цIех-рехалъул комитеталдаса».

Жидеда чIалгIун бугин гьеб суал гIемер борхунилан абуна Временное росулъа ПатIиматица ЭР-гун букIараб гара-чIвариялда. Гьединлъидал аскарияз жидее нахъе тараб балагь-базаралда цIар гIицIго лъабго рагIудалъун цебе чIезабизе бегьулила.

ПатIимат: «Гьале дица абулеб буго дуда – бикъа-хъами, мародерлъи, гIорхъи лъангутIи. Гьеле гьеб лъабго рагIудалъун абун гурони, нижер тIокIаб абизе жо гьечIо гьелда тIасан».

Временное росу территориялъул хIисаб гьабун, Унсоколо мухъалъул Генуб росдада гьоркьобе уна. Гьенире гочун чIун руго гьабсагIаталда Временноялдаса гIадамал, гендерил школалде уна гьезул лъималги. Гьединлъидал цIакъ кIвар кьезе кколин хадубккун Временное росулъ магIишат цIигьабизе байбихьидал, школа, культураялъул рукъ, азархана баялдеян бицана гендерил бегавул АлясагI МухIамадовас.

Гьес гьединго бицана 54 млн гъурщил багьаяб лъималазул ахги базехъин бугин Временноялда. Амма хасаб операция тIобитIулаго гьеб росдае ккараб зарал бецIизе гIураб гIарац биччан гьечIин жегиян рикIкIунеб буго гьес.

XS
SM
MD
LG