Шималияб Европаялъул улкаби цIунулел министрабаз хамиз къоялъ Норвегиялъул тахшагьар Ослоялда данделъана ва тасдикъ гьабуна цадахъаб декларация.
Гьелда абулеб буго жал хIадурал ругин Европаялъул хIинкъи гьечIолъи цIуни мурадалда жидерго рагъулал бухьенал церетIезаризе.
Швециялъул, Норвегиялъул, Финляндиялъул, Даниялъул ва Исландиялъул улкаби цIунулел министрабазул цадахъаб лъазаби загьирабун буго Норвегиялъул прессалда.
Гьелда гьединго абун буго Россиялъ Европаялъе хIинкъи кьолеб бугин. Москваялъ бихьизабунин жиндирго политикиял мурадазе гIоло жиб рагъулал алатал хIалтIизаризе хIадураб букIин.
Швецияги Финляндияги НАТО-ялъул мушавара улкаби гьечIониги, жидеца шималияб атлантикияб блокгун жидерго бухьенал гIатIилъизарулел руго.