МагъчIваялъе рес

«Гьанже полициялъ изоляторалъул азбаралъургицин рухулел руго гIадамал...»


Гьал къоязда МахIачхъалаялда бугеб цIех-рех гьабизе жанир тIамулеб 1 изоляторалъул азбаралъув полициялъул хIалтIухъабаз вухун вуго Хасавюрталдаса ГIалиев Рашидхан.

Сундуе гIоло гьев вухарав ва гьабсагIат кив вугевали лъалев гьечIин гьев василан абулеб буго гьесул гIагарлъиялъ. Гьеб лъугьа-бахъиналъул цIех-рех гьабизе инкар гьабулеб бугин хасал идарабазин абунги разигьечIолъи буго гьезул.

Дагьал церегIан къояз тIагIун вуго Хасавюрталдаса 26 сон барав ГIалиев Рашидхан. Гьесул гIагарлъиялъиялъ лъазабулев вуго гьев МахIачхъалаялъул заманалъ гIадамал жанир тIамулеб 1 изоляторалде араб бакIалдаса тIадвуссун вачIинчIилан. Гьезухъе баянал щун руго изоляторалъул кIалтIа жаниве ине иргаялда чIун вукIарав гьев полициялъулаз вухун вугилан.

Вухарасул гIагарай чIужу Салимова Эльмираца «Эркенлъи» радиоялъулгун букIараб гара-чIвариялда бицана Рашид гьеб изоляторалда вугев жиндирго гьудуласде щвезе, гьесие къваригIараб-тарабги босун ун вукIанилан. НугIзадерица бицун буго гьесул гIагарлъиялда, сумкаги босун гьев изоляторалде жаниве анин цин, хадувги тIад вуссун иргаялда чIезе азбаралъуве вачIанин. Гьеб мехалда гьесда хадув полициялъулав кIанцIун вачIанин, дорегIанги ун гьел цоцада гаргадизе лъугьанила, гьелдаса хадуб дагIбаданила гьелилан.

Салимова Эльмира: «Изоляторалда жаниса къватIире кIанцIун рачIун руго 10 ниги полициялъулав. Гьев вухизе лъугьун руго гьел. Рашидги дов полициялъулавги дагIбадилел рихьун ратилаха гьезда, яги дос ахIун ратила гьелъул мухIканлъи лъалеб гьечIо. Гьез малаца гьавун, резнал тIилаца вухун вуго гьев. ТIадежоялъе эххедеги кьвагьделел рукIун руго гьел. Гьеб гIаги щибизе гьабураб жояли лъаларо дида, гIадамал хIинкъизарие гьабун батилаха. Гьеб кинабго бихьараз бицана Рашид гIемер вухиялъ рекIедаса ун вукIанин. Живго вилълъун бажарунеб яги вахъун чIолеб хIал букIун гьечIо гьесул. Гьедин вугев чи изоляторалде жаниве вехъерхъун ун вуго гьев».

Гьединго Эльмираца бицана цониги чи аскIове къанги гьечIила гьев гIолохъанчи вухулелъулилан. Гьев щибизе вухулев чийиланцин абизе кIун гьечIила цохIонигиязда. 2 къоялъ хадурги лъугьун хIалихъе ралагьанила жидеца гьеб лъугьа-бахъиналъул нугIзал, хIинкъун, жидеда щибниги бихьичIилан чIун рукIанила гьел. Полициялде жидеда цадахъги рилълъун гьеб лъугьа-бахъиналъул хIакъалъулъ бицинеги щивниги разилъичIилан. Гьанже жидеца прокуратураялде гIарза хъван бугила изоляторалъул азбаралъуре ралагьизарун ругел видеокамерабазул записалъухъ балагьейин абун.

Эльмир Салимова: «Гьенир цере киса-кирего видеокамераби руго, гьез кинабго жо бахъун букIине ккола. Нижеца МахIачхъалаялъул прокуратураялде гIарза хъван буго гьеб лъугьа-бахъиналъул хIакъалъулъ. Гьелдаго тIалаб гьабулеб буго гьел видезаписазул халгьабейилан. Гьединан гьабун гурони гьеб лъугьа-бахъиналъул хIакъалъулъ бицун бажарулев чи гьечIеблъидал. Цониги чи разилъичIо нижеда цадахъ нугIлъи гьабизе вилълъине. ХIинкъун руго гIадамал. ХIинкъиялъул кутакалъ гьенир азбаралъур иргаялда чIун ругел анцI-анцI гIадамазул цохIонигияв аскIове къан гьечIо гьев вухулеб мехалда гьесий кумекалъе. Киналго тIаде балагьун чIун рукIун руго».

Гьединго Эльмираца бицана Рашид тIагIун вугин абунги гIарза хъванила жидеца хасал идарабазде, амма жеги гьелъул щибниги хIасил ккечIилан. Вухарасул гIагарлъиялъул щаклъи буго гьев гьебго изоляторалъув яги цойгидаб батIияб туснахъалъув тIамун ватизе бегьулилан. Вухиялъул лъалкIал ун рахъинегIан гьенив тун ватизе бегьулин, яги гьес къанун хвезабунин абун, тIад иш гьабизе багьана балагьулел ратилин низам цIунулелилан. Гьел хIинкъун руго ГIалиевас полициялъулазда кьабунин, гьезде тIадекIанцIи гьабунин абун багьана батилин къуваталъул идарабазилан.

Дагъистаналъул жанисел ишазул министерлъиялъул пресс-хъулухъалъ «Эркенлъи» радиоялда лъазабуна гьев ГIалиев Рашидхан тIагIиналда хурхун хехал цIех-рехалъул ишал гьарулел ругила, гьев полициялъулаз вухиялъул хъвараб гIарзаялъулги халгьабулеб бугилан. Амма гьел тадбиразул жеги цониги хIасил гьечIин лъазабуна гьеб идараялда.

Дагъистаналъул инсанасул ихтиярал цIунулеб «Правозащита» идараялъул хIалтIухъан Тарасова Фатимаца «Эркенлъи» радиоялъе бицана полициялъулаз рухиялъул хIакъалъулъ бицун жидехъе гIарзал хъван рачIаразул цохIонигиязухъ ритIухълъи чIезабун бажаринчIила. Дагъистаналъул цIех-рехалъу системаялъ ва диванчагIаз киданиги низам цIунулезда гIайиб ккезе толарила. Гьединго Фатимал рагIабазада рекъон чи вухиялъул, хIатта гьев викъиялъул нугIлъи гьабулеб видеозапись бугониги, гьеб гIажаибаб къагIидаялъ кидаго тIагIун батулилан.

XS
SM
MD
LG