МагъчIваялъе рес

Немцов чIваялда щаклъи бугез инкар гьабулеб буго гьелъулъ гIахьаллъи букIиналдаса


Оппозиционияв политик Борис Немцов чIваялда щаклъи бугев чачаназул полицияв Дадаев Заурица лъазабуна жинца гьев чIванин абун букIаралдаса инкар гьабулеб бугин. «Лефортово» туснахъалде гьесухъе щвезе рачIарал тохаллъи гьабиялъул ЖамгIияб комиссиялъе ва гьездаго цадахъ «Московский Комсомолец» газеталъул мухбирасе Дадаевас бицун буго жиндир квераздаса ва хIатIазда кIиго къоялъ рахъун рукIинчIин маххалги ботIродаса бахъун букIинчIин таргьагийн. Гьедин жив балагьун чIун вукIанин диванханаялъухъ жинда гIайиб бугин абизелъун.

«11 соналъ дун къеркьолев вукIана такъсирчилъигун, дица цIунулел рукIана Россиялъул мурадал. Кинабалиго УПК цIализе дие заман гIечIин абун кIалъазе рагIи кьолеб гьечIо дие. РитIухълъи киб бугеб?»-ян гьикъулеб буго Дадаевас.

Инсанасул ихтиярал цIунулел гьединго щун руго гьеб ишалда хурхун гIайиб гIунтIизабулел кIиго вац Анзоргун Шагьид Губашевазухъеги. Гьезги гIарз гьабун буго жидее гIакъуба кьолеб букIанин ва кколеб мехалда жал руханин.

Россиялъул жанисел ишазул министрелъиялъул жанисел аскаразул нухмалъулев хисулев Игорь Грудновас абун букIана талат къоялда Дадаев Заур- «Север» абулеб батальоналъул нухмалъулев хисулев-28 февралалда хIалтIудаса рехун вугин, 27 февралалдаса нахъе абуни гьев хIухьбахъиялда вугин.

ХIухьбахъиялда вугев чи хIалтIудаса кин рехаравали гьес баян гьабичIо.

Немцов чIваялъул ишалда сверун гIайиб гIунтIизабулеб буго цоги кIиго чиясдаги. Гьел ккола Бахаев ХIамзат ва Эскерханов Тамерлан.

Вацал Губашеваз ва Бахаевас жал туснахъалъур кквеялда тIасан гIарза хъван буго гьанжеялде.

Москваялъул Хельсинкиялъул къукъаялъул лидер Людмила Алексеевалъ талат къоялда лъазабун букIана Немцов чIвазе тIадкъай кьурав чи ватиялда жиндир цIакъ кIудияб щаклъи бугин.

Гьелъ «Интерфаксалъе» абун буго: «Чан чачанав ккунин абуниги, Немцов чIвазе тIадкъай кьував чиясул цIар рагIине къваригIун буго дие. Амма щаклъи буго гьеб къо щвезегIан дун хутIиялда. Гьединго абизе гьечIо Политковская ва Старовойтова чIвазе буюри кьуразул цIаралги»,-ян.

Немцов чIван вукIана Москваялда 27 февралалъул сардилъ.

XS
SM
MD
LG