МагъчIваялъе рес

Украиналда конфликталъул рахъаз цоцазде рехулеб буго кьвагьи чIезабиялъул низам хвезабиялъул гIайиб


Украиналда рагъулаз ва сепаратистаз цоцазде тIаде рехулеб буго 15 февралалда лъазабун букIараб кьвагьи чIезабиялъул низам хвезабиялъул гIайиб. Киевалъ цIидасан лъазабулеб буго рагъал унел рукIарал бакIазда бугеб рагъулаб бакIаб техника нахъе бачине жидер рес гьечIолъиялъул.

Украиналъул машрикъалъул рахъалда хасаб операциялъул штабалъул вакил Анатолий Стельмахица абуна цо итни къоялда жаниб сепаратистаз Украиналъул аскаразде кьвагьиялъул 24 хIужа букIанин. Кьвагьун буго Попасная, Луганское, Опытное, Тоненькое ва Авдеевка росабазде. Гьединго сепаратистаз хIалбихьун букIун буго Широкино абулеб росдае гьужум гьабизе.

Донецкалъул халкъияб абулеб республикаялъул вакилзабаз лъазабулеб буго Украиналъул рагъулаз Донецкалъул аэропорталде ва Пески абулеб росуялде кьвагьулеб букIанин.

Гьебго республика цIуниялъул министр Эдуард Басуриница «Интерфаксалъе» лъазабун буго жидеца рагъулаб бакIаб техника нахъе бачунеб бугин цебесанккун ругеб секторал ккунин, жакъа гьел рукIанин Дебальцево, Горловка, Донецк ва Тельмановоян.

12 февралалда гьарурал Минскалъул къотIиязда рекъон, конфликталъул кIиябго рахъалъ бакIаб техника нахъег1ан бачиналъул иш 16 февралалдаса байбихьун кIиго анкьида жаниб лъугIизабизе кколеб буго.

XS
SM
MD
LG