МагъчIваялъе рес

Пенсиязул фондалда сверун цIидаса гьерсал тIиритIизаруна


Дагъистаналъул Пенсиязул фондалъул киналгIаги финансазда хурхарал документал нахъе рахъулел ругин абураб хабар тIибитIана интернеталда. Амма жибго идараялъул вакильзабаз абулеб буго гьел кьучI гьечIого рицарал харбал кколин.

19 февралалъ Дагъистаналъул пенсиязул фондалда низамцIунулез документазул цIех-рех тIобитIиялъе гIиллалъун кканин материнский капиталалъулгун гьарурал макрабазул гIарз букIин ва гьел макраби тIалъиялъул гIахьаллъи гьечIого гьаризе рес гьечIин лъазабулеб буго гьениб.

КиналгIаги хIалтIухъабазда гъорлъ тIобитIулеб бугила цIех-рех. Живго Пенсиязул фондалъул нухмалъулев Сайгид МуртазгIалиев хIалтIуда гьечIила.

Амма гьеб информация гьересияб бугин баян гьабуна «Эркенлъи» радиоялъе Пенсиязул фондалъул пресс-хъулухъалъул нухмалъулей Альбина Сункулиевалъ. Гьелъул рагIабазда, гьеб буго провокация.

Альбина Сункулиева: «Бокьарав чи балагьизе вачIине бегьула, гьаниб цогIаги ракIарарал чагIазул гьечIолъи ва киналгIаги низамцIунулел гьечIолъи бихьизе. Гьеб кинабго буго цо лъие букIаниги цIакъ хIажатаб жо, мекъса информация тIибитIизаби. КиналгIаги халгьариял, яги документал нахъе росиял нижер гьанир тIоритIичIо. Нижер нухмалъулевги хIалтIуда вуго».

Дагъистаналъул Жанисел ишазул министерлъиялъ гьенир жидер идараялъул вакилзаби гьечIолъи мухIканаб бугин баян гьабуна. Гьениб хал гьабиял тIоритIулел ратаниги гьезул жавабиял кколила Федералияб цIунакъаялъул низамцIунулел.

Гьелдаса цебеги, Миграциялъулаб хъулухъалъул Дагъистаналда бугеб идараялъул нухмалъулев Ражаб ГIабдулатIипов низам цIунулез ккун вугин, тIубан мухIкан гуреб информация тIибитIизарун рукIана интернеталда.

XS
SM
MD
LG