МагъчIваялъе рес

Иргаялда чIа!


Дагъистаналда кIвар бугеблъун хутIулеб буго лъимал ясли-ахаздалъун хьезариялъул суал. Жакъа къоялъ электронияб иргаялда хъван буго 80000 цIикIкIун лъимер. Ришватал роси лъугIизабизейин гьабун букIараб гьеб системаялъ кинабгIаги хиса-баси ккезабун гьечIо ва улбухъа цебе гIадин гIарац тIалаб гьабулеб буго лъимер яслиялде къабул гьабуралъухъ. ГIицIго хисун буго ришваталъул къадар.

«Лъималазул ахал-лъималазе» абураб прект гIумруялде бахъинабулаго 2015 соналъул февралъ моцIалде щвезегIан кинабниги 12 цIияб лъималазул ах рагьизе бугин Дагъистаналдайилан лъазабулеб буго «Единая Росия» партиялъул сайталда. Гьедин цIиял лъималазул ахал рагьизе руго Хасавюрт, Буйнакск, МухIарамкент ва цогидал мухъазда. Социалияб кIвар бугеб бакIазул суал кидагосеб букIиналъ, 2015 соналъул бюджеталда 25 млн. гъурущ бихьизабун буго хас гьабун гьеб суал тIубаялъе.

Араб соналдаса байихьун, Дагъистаналда яслиязде лъимал росизе хIалтIизабизе байбихьана элоктронный иргаялъул система. Жакъа гьелда рекъон, Дагъистаналда лъималазул ахазде иргаялда хъван руго 80 азаргоялдаса цIикIкIун лъимер.

Араб соналда жаниб Дагъистаналда рагьун буго гIицIго 12 лъималазул ах, гьездалъун, хьезарун ругин г1ицIго лъабазаргоялдаса цIикIкIун лъимерин баян гьабулеб буго «Лъималазул ахал-лъималазе» абураб проекталъул нухмалъулей Жанна Сулаевалъ.

Электронияб иргаялъул система гьабулаго лъазабулеб букIана гьелъ коррупция тIагIинабизе бугин ясли-ахазде лъимал росиялда жаниб. Гьедин, 2014 соналъ, лъимаде яслиялда бакI бахъаралъухъ эбел–инсухъа тIалаб гьабулеб букIана 30 000 гъурущ. Амма электронияб иргаялъул система бачIиндалги щибго хисичIин, тIадеги доллар бахун букIиналъ чIезабураб багьа 50 азарго гъурщиде баханин баян гьабулеб буго МахIачхъалаялдаса ГIисаева ПатIиматица. Гьедин, араб соналъул ахиралде лъималазул ахалде лъимер босаралъухъ тIалаб гьабун буго 50 азарго гъурущ МахIачхъалаялда. Цогидал шагьаразда багьаби дагьал гIодорегIан руго, масала Каспийск шагьаралъул лъималазул ахалда тIалаб гьабулеб буго 30 азарго гъурущ, араб соналъ гьеб букIун буго 20 азарго гъурущ.

Электронияб ирга гьабун букIаниги, гьелде аслияб куцалъ кIвар кьоларин, гьелдаги божуларин баян гьабулеб буго Каспийск шагьаралдаса АхIмадова Марижатица. Марижатил ясалъе гьабсагIат буго 3 сон. Ясалъ лъагIел балелде кьун рукIанила киналгIаги кагътал ва яслиялда бакI щвезе иргаялдаги чIанила, амма гьенире индал , иргаялда чанабилеб бакIалда ругелали хал гьабизе рес щвечIила, жидер компьютер хIалтIулеб гьечIин абунин баян гьабуна «Эркенлъи» радиоялъе Марижатица

АхIмадова Марижат: «Яс гьаюн 3 моцI байдал иргаялда чIун рукIана ниж. Исана яслиялде ниж индал, нижеда абуна гьениб бакI гьечIин, 20 лъимер босула цо къокъаялде, гьедигIанго лъимал жеги иргаялдаги рукIана гьенир. Гор.ОНОялда бугеб электронияб иргаялда кир ниж ругелали цIехедал, жидер техникиял лазатбахъиял ругиланги абуна, амма гьеб иргадухъ сайталдаги хал гьабизе бегьула, нижер гьаниб бугеб ахалъул гьеб ирга бихьизабулеб гьечIо, х!алтIулеб гьечIо гьеб сайт. Яслиялдаса къкватIире ниж унаго, нижеда аскIое ячIана цо гIадан, гьенисан батIагоги ячун, гьелъ бичIчIизабуна, бокьанани бакI бахъизе кIолин, амма 30 000 гъурущ гIарац кьезе кколин. Дун хIикмалъизаюна гьеб хабаралъ, хадуб, цогидал улбуздаги гьебго абун букIин бичIчIана. КIиго соналдаса цIикIIун заманаялъ иргаялда хъван бугеб лъимер кин бакI щвечIого букIинеб кколеб. Киса-кибего, киналго ахазда буго гьеб ахIвал-хIал».

Жидада абунила, гьеб ахалъул нухмалъулей ришват босулаго тIакквезе бегьулин. Амма гьелда жал божуларила, араб соналъ гьедин ккун йикIанила цогидаб ахалъул нухмалъулей, жакъа гьей жиндирго хIалтIуда йигила.

ХIакъикъаталда, электронияб иргаялда рекъон, лъимаде ирга щведал гьеб лъимер тIадегIанаб лъай босулеб ригьалде бахунин рикIкIунеб буго МахIачхъалаялдаса СултIанахIмадица. Гьес жиндирго вас ришват кьун хIукуматалъул яслиялде витIичIогон, моцIи-моцIие гIарац кьун хIукуматалъул гуреб яслиялде витIулев вуго. Жакъа Дагъистаналда цIакъ тIиритIун руго хIукуматалъул гурел лъималазул ахал. ХIукуматалъул ахалде лъимер битIизе гIемер квекIенал рукIиналъ, улбуз лъимер гьединаб ахалде битIулеб буго.

2014 соналъул статистикаялда рекъон, Дагъистаналда 163450 6-соналъул ригьалде бахинчIеб лъимер буго. Гьезул гIицIго 83 000 лъимадул рес буго ясли-ахазде хьвадизе.

Комментариял (1)

Гьаб форум къан буго
XS
SM
MD
LG