МагъчIваялъе рес

Гьикъе-бицина

Паспорт батичIони гIакIа къотIулищ?


ЦIалдолез Эркенлъи Радиоялде бачIараб иргадулаб суал буго документал кодор ратичIев чи полициялдеги вачун гьесда тIад гIакIа къотIизе ихтияр бугищин абураб.

Хасавюрталдаса Исламов МухIамадгIалица «Эркенлъи» радиоялде бачIараб суалалда цIехолеб буго Хасавюрталдаса МахIачхъалаялде автомобилалда рекIун рачIунаго нухда, полициялъулазул посталда жал лъалхъизарунила ва документал цIеханила. «Цо-цоязухъ я паспорт ялъуни цогидаб документ батичIо. Гьединлъидал, ниж рачана полициялъул бутIаялде ва 500 гъурщил гIакъа къотIана. Бокьилаан лъазе гьеб инсанасул ихтиярал хвезарилъун кколарищали», - абун гьикъулеб буго Исламов МухIамадгIалица.

Гьаб суалалъе жаваб кьолаго республикаялъул жанисел ишазул министерлъиялъул нухазда гIадлу-низам цIуниялъул пачалихъияб инспекциялъул идараялъул халкъалда гьоркьоб бичIчIикьеялъулаб хIалтIи гьабиялъул бутIаялъул нухмалъулев СултIанов ГIисалмухIамадица бицана гьеб бугила Дагъистаналда бугеб ахIвал-хIалги хIисабалде босун гьабулеб хIалтIи ва гьединаб иш гьабизе полициялъул хIалтIухъабазул ихтиярги бугила. Гьезул ихтияр бугила щаклъи ккарав чи яги чагIи щив яги щал кколелали лъазариялъул мурадалда полициялъул бутIаялде рачине. Административияб къануналда рекъонин абуни, жив щив кколевали бихьизабулеб документ кодоб батичIев чи полициялде вачин ва гьев тамихIалде цIай къанун хвезабилъунги кколарила.

Юрист МухIамадов Бияхъайица бицухъе, къануналда рекъон полициялъулазул ихтияр рагIула кодоб документ гьечIев чи, гьев киса щив кколевали лъазабизелъун лъабго сагIаталъ полициялъул бутIаялда кквезецин.

МухIамадов Бияхъай: «Гьединаб ихтияр буго полициялъул. Амма кодоб документ батичIогойилан тIад гIакъа къотIизе кколин къануналда хъвараб бакI гьечIо. Масала, ЦIунтIа, ЦIумада ва цо-цо цогидалги мухъал руго гIурхъи цIунулез документ гьечIого жанив-къватIив чи виччаларев. Гьединабги буго Жанисел ишазул министерлъиялъ ва федералияб хIинкъи гьечIолъиялъул хъулухъалъ тIалаб гьабун бахъарабги къанун».

Юрист МухIамадов Бияхъайица бицухъе, гьел мухъазда документ гьечIездехун гьединаб балагьи гьабуниги, цогидал бакIазда тIад гIакIа къотIи кколеб буго къанун хвезабилъун.

XS
SM
MD
LG