Парижалда гъоркьехун анлъго чи гъоркьлъалие восиялъул хIасилалда чIван вуго кIигояв. Полициялъ лъазабулеб буго Парижалдаса шималиябгун-машрикъалъул рахъалда кошериял кванил нигIматал ричулеб тукада щивали лъаларев чияс кьвагьи байбихьун бугин.
Полициялъул щаклъи буго гьеб тукаде тIадекIанцIиги хамиз къоялда Монруж абулеб бакIалда полицияй чIварав ва гьелъул коллега лъукъарав чи ватиялда.
Гьелдаса цебе рузман къоялда полициялъ лъазабулеб букIана 7 январалда Парижалда сатирияб даптаралде тIадекIанцIи гьабиялда щаклъи бугел вацал Куашиялгун гьез бухьен гьабун бугин.
Амма хадусан гьеб лъазаби ритIухъ гьарулел баянал рукIинчIо.
Куашиял кквезелъун операция тIобитIулеб буго Парижалда гIагарлъухъ бугеб Даммартэн-ан-Гоэль абулеб букIалда.
Гьелдаса рикIкIада гьечIеб Шарль Де Голлил цIаралда бугеб аэропорталда чIезе тун руго киналго рейсал. Сверухълъиялда къан руго киналго школаби.
Charlie Hebdo (Шарли Эбдоялде) тIадекIанцIи гьабураб мехалда чIван вукIана 12 чи, гьезулги 8яв журналист ва 2яв паолицияв рукIун руго. Ахирисел баяназда рекъон, лъукъун вуго 11 чи.
ЦIех-рехалъ рикIкIунеб буго вацал СагIид ва Шериф Куашиял ругин рехсараб даптаралъ МухIамад аварагасде карикатураби рахъиялъухъ къисас босарал исламиял экстремисталин.
Гьел рижун ва гIун руго Парижалда Алжиралдаса бачIараб хъизамалда. Гьединго лъан буго гьезул кIудияв вац СагIид 2011 соналда Йеменалда «Аль-КъагIидалъул» рухIияв цевехъангун дандчIван вукIараблъи.
ГьитIинав Шериф лъабго соналъ туснахъ гьавун вукIун вуго ГIиракъалде рагъизе гIадамал ритIиялъулъ гIахьаллъи букIун.
Лъазабулеб буго гьел «Бют-Шомон» абулеб исламияб къукъаялде гъорлъе унел рукIанинги.