19 декабралда рузман как бан къватIире рачIунел гIадамал низам цIунулез полициялъул бутIаялде щвезарун руго. Буйнакск шагьаралъул жанисел ишазул бутIаялда ккуразул цIар мухIкан гьабун хадуб гьел риччазе ругилан лазабун буго.
МахIачхъала-Буйнакск нухда бугеб салафиязул абулеб мажгиталде кидаго гIемер гIадамал рачIунаанин, хIатта къватIир чIунцин рукIунаанин рузман балеб мехалъ, амма гьаб нухалъ гIадамал гIемер рукIинчIин, гьезда лъалеб букIун батизе бугин полициялъулал рачIине рукIинин баян гьабулеб буго мажгиталде хьвадулезул цIар бицине бокьичIев чияс.
Полициялъулаз ккун рачун анин 10-15 чи гIолилазул ва гьединго кIиго чIужугIаданги.
«Эркенлъи» радиоялъухъе щварал баяназда рекъон, гьезул цо-цоял риччан руго. Амма жеги бутIаялдаго хутIарал кида риччалелали лъалеб гьечIо
Гьеб тIоцебесеб нух гуро Дагъистаналда салафиял мажгитаздаса ккун рачун унел низам цIунулез. Гьедин, 31 октябралда МахIачхъалаялда Венгриялъул рагъулазул къватIалда бугеб мажгит сверун ккун букIана рагъулаз. Гьениб низам цIунулезда ва мажгиталда рукIаразда гьоркьоб ккараб тунка-гIусиялъул хIасилалда 5 чи ккун вукIана.