МагъчIваялъе рес

Хасавюрталда администрациялъул минаби сверун ккун руго


Хасавюрт шагьаралъул ва Хасавюрт мухъалъул администрациялъул минаби сверун ккун руго аскарияз. Гьелъие гIиллалъун ккун буго низамцIунулез гьениса документал нахъе росулел рукIин.

16 декабралъ, къадеялдаса байбихьун, шагьаралъул ва районалъул администрациялъул минаби ругел къватIал сверун ккун руго рагъулаб техникаялъ, гьединго жалго минабазда жанибе нух къан буго. Низам цIунулез кьурал баяназда рекъон, гьениб ракьал рикьиялда хурхараб документация нахъе бахъулеб бугила. Гьеб иш гьабулел низамцIунулел кколел руго батIиял регионаздаса ритIун рачIарал. Минаялдаса я къватIиве, я жаниве чи виччалев гьечIилан лъазабулеб буго полициялъулаз.

Хасавюрт мухъалъул администрациялъул хIалтIухъаналъ кьурал баяназда рекъон, захIмалъулеб буго кинаб документация гьез бахъулеб бугебали абизе. Гьединго, хIалтIул къо лъугIун хадуб гьенир жанир ккун хутIизе рес бугила хIалтIухъаби , низам цIунулез тIобитIулеб тадбир лъугIизегIан.

Администрациялъул хIалтIухъан: « БитIараб бицани, гьениб щиб хал гьабулеб букIарабали дида мухIканго абизе кIоларо. Ниж хIалтIулел руго Рукъалъулгун коммуналиял суалазул бутIаялда. Цониги хIалтIухъан къватIиве жаниве виччалев вукIинчIо. Сверун ккун букIана минаги. Щиб кинали нижеда нижедагоги кIоларо абизе. Щай гьеб хал гьаби тIаде бачIарабалиги захIматаб суал буго. ХIалтIул къо лъугIигун ниж рокъоре ана. Ракь бикьиялъул суалазул жавабиял хIалтIухъаби гьенирго ратизеги рес буго».

Хасавюрт шагьаралъул администрациялъул мина гьединго сверун ккун букIин мухIкан гьабуна «Эркенлъи» радиоялъе гьениса хIалтIухъанас, амма тIокIал батIиял баянал щвечIо.

НизамцIунулез тIобитIулеб гьеб тадбиралда хурхун киналгIаги баянал кьечIо Дагъистаналъул цIех-рехалъул коммитеталъги

Гьанибго абизе ккола, релълъарал тадбирал тIоритIун рукIанин Хасавюрт мухъалда цереги. Гьедин, I8 июналъ финансазда хурхарал документал нахъе рахъун рукIана низамцIунулез. Шагьаралъул администрациялъ лъазабухъе, гьеб мехалъ бюджет харжгьабиялда сверун ахIвал-хIал роцIинабулеб букIана.

XS
SM
MD
LG