Инзу гьечIого яргъидгIуцIаразде гъорлъе ине бегьулелгун хIалтIи гьабизе бугин цIияб гIуцIиялъин, лъазабуна Дагъистаналъул вице-премьер Рамазан Джафаровас. Централъе нухмалъи гьабизе буго Севиль Новрузовалъ. Гьей кколаан Дербенталда бугеб ракълилаб комиссиялъул нухмалъулейлъун.
Экстремизмалъул профилактика гьарулел централ гIагараб заманалда раккизе руго МахIачхъалаялдаги Хасавюрталгиилан бицана Джафаровас. Гьесул рагIабазда рекъон, гьел центраз кумек гьабизе буго республикаялда бугеб ахIвал-хIал парахалъизабизе. «ЦохIо харбаз ва гургинал столаз профилактика гьабуларо. Гьеб хIалтIи гьабизе ккола рохьилаздехун цодагьабниги лъикIаб бербалагьи бугел яги гьезде гъорлъе ине бегьулев жив-жив чигун. ХIакимазул ва жамгIиял гIуцIиязул данделъабазда чанги битIарал жал рицуна, амма гьениб бицунебщинаб гьеб рагIизе кколезухъе щолеб гьечIо. Гьелдалъун рагьулеб буго хасаб центр», - илан бичIчIизабуна Джафаровас.
Экстремизмиял идеябазул рахъ ккезе бегьулезул сияхI бугин централъулилан бицана Джафаровас, амма гьеб сияхI кисса щвараб ва щиб жолъун кколеб мухIкан гьабичIо. Инсанасул ихтиярал цIунулез абулеб буго, гьеб батизе бегьулин Дагъистаналъул жанисел ишазул министерлъиялъ гьабураб «чIегIераб сияхI». СияхIалда ругелгун профилактикияб хIалтIи гьабизе рагIула диниял хIаракатчагIаз, психологаз, педагогаз ва гь.ц.
«РакIалде буго гьеб централъ кумек гьабилин гIолохъанал васазе къануналъул нухдаса инчIого чIезе. Дагъистаналда гуребги, Шималияб Кавказалъул регионаздаги рагьизе ккола гьединал централ», - илан загьир гьабуна жиндирго пикру Новрузовалъ.
Исламиял цIех-рехал гьарулеб Шималияб Кавказалъул централъул нухмалъулев Руслан Гереевасул пикруялда рекъон, экстремизмалъул профилактика гьабулеб жамгIияб гIуцIи жакъа Дагъистаналда чара гьечIого къваригIун букIана. Дуниялалда бугеб ахIвал-хIалги, Сириялда кколебщинабги, «Исламияб пачалихъалъул» къуватцIикIкIиги хIисабалде росун, абизе бегьула экстремизмалъул профилактика гьабулеб центр баккин лъикIаб хIужжа бугин, бицана «Эркенлъиялъе» жиндирго пикру Гереевас.
Экспертасул рагIабазда рекъон, жакъа къоялда Россиялда экстремизмалъул идеябазул рахъ ккезе бегьулеллъун рикIкIине бегьула Шималияб Кавказалдаса гIолилал, гьезда гьоркьоса гIемерисел унел руго Сириялде «Исламалъул пачалихъалъул» рахъги ккун рагъизе. «ТIадруссиндал гьез жидерго республикабазда ракълилаб гIумру гьабилин абураб жоялда божи дагьаб буго», - ян абуна Гереевас.
Гьанибго тIаде жубала, чанги информалатаз лъазабун букIана Сириялъул оппозициялъул рахъккун рагъулел ругин гIемерал кавказалъулал. Азарго кавказалъулав гъорлъе унев батальон гIуцIун бугин, хъван букIана NewsRu.com информалаталъ.
Экстремизмалъул профилактика гьабулеб централъ хIаракат бахъизе ккола пачалихъиял идарабазул хIалтIи лъикIлъизабизегилан абуна Гереевас.
Руслан Гереев: «ТIоцебе Дербенталда гьеб центр рагьиялъе гIиллаби руго. Югалъулаб Дагъистаналда буфернияб зонаилан абизе бегьула, щайгурелъул гIемерисала гьениса Россиялде рорчIуна цогидал улкабаздаса батIи-батIиял радикалал. ТIадежоялъе, гIемерисала гьенир рахчун чIола Россия тун къватIире тIуризе къасд бугел боевикал. Гьелдалъун, экстремизмалъул профилактика гьабулеб центр тIоцебе Дербенталда рагьи лъикIаб ишлъун бихьула дида. Гьеб централъ, дир пикруялда рекъон, халгьабизе ккола гIолилалгун кинаб хIалтIи гьабулеб бугеб муниципалияб нухмалъиялъ, низам цIунулел идарабаз, жамгIиял гIуцIияз, динияб идараялъ. Гьел киназулго хIалтIи эффективияблъун гьабизе ккола централъ. Гьел рехсарал идарабазул хIалтIи цолъизабизе ккола централъ».
ЦIирагьараб гьеб централъ ракълилаб комиссиялъул хIалтIи такрар гьабулеб бугилан баянал руго социалиял сайтазда. Амма Новрузовалъул рагIабазда рекъон, ракълилаб комиссиялъ кумек гьабулеб буго рохьилазда гъорлъ ругел чагIазе гIадатияб гIумруялде тIадруссине, централъулни мурад буго батIияб: рохьилазде гъорлъ ккеялдаса гIолилал цIуни.
Гьанибго тIаде жубала, Дагъистаналъул жанисел ишазул министерлъиялъул баяназда рекъон, исана ракълилаб комиссиялъ гIадатияб гIумруялде тIадруссинаруна анцIго рохьилав ва I2-ясул гIарзабазул халгьабулеб буго.
