МагъчIваялъе рес

Тунка-гIусиялда гIайиб гьечIелищ чIварал?


Изну гьечIого яргъид гIуцIарал къукъабазде гъорлъе унел кIигоял чIванин гьал къоязда Гъизилюрт мухъалдаилан лъазабуна прессаялдаса. Информациялъул алатазул баяназда рекъон, лъугьа-бахъин ккана Шушановка росда гIагарда.

«Полициялъул хIалтIухъабаз автомобилазул хал-шал гьабулеб букIана гьеб росуда аскIоб. Хъамун бачIунеб «Лада-Приора» автомобиль чIезабизе хIалбихьана полициялъулаз, амма машина чIезабичIо. Гьелда хадур рортана низам цIунулел.

«Лада-Приораялдаса» полициялъул автомобилалде кьвагьдезе байбихьана. Полициялъулазги хIалтIизаруна автоматал. Тунка-гIусиялда «Лада-Приораялда» жанир рукIарал чIвана», – илан хъвалеб буго гьеб лъугьа-бахъина лда тIаса батIи-батIиял информалатаз.

ЧIваразул автомобилалда жаниб низам цIунулезе батун буго Калашниковасул автомат, Макаровасул тапанча, Ф-1 граната, алюминияб хIурги аммикалъул селитраги жуба гъубараб жоялъул цIураб таргьа.

«Аиф-Дагестан» газеталъ лъазабулеб буго, полициялъулаз кIиго чи чIванин ва гьезул цоясул цIар лъазабунин. Гьев ккола 40 сон барав ХIабиб МахIмудов. Гьанибго тIаде жубала, гьесул вац МухIамад МахIмудов чIвана хасаб операциялда.

«Дидоязул» илан абураб изну гьечIого яргъид гIуцIараб къукъаялъул къадийлъун рикIкIунев вукIана гьев. Гьал къоязда чIварав ХIабиб МахIмудов «Гъизилюрталъулаб» абулеб къукъаялде гъорлъе уневлъун вукIанин лъазабуна «Русская планета» сайталъ. Тунка-гIусиялда чIварав кIиабилесул цIар жеги мухIкан гьабун гьечIо.

Полициялъузда гьоркьосан щивго лъукъичIо ва чIвачо. Лъугьа-бахъиналда тIаса официалиял баянал жеги рукIинчIо ва Дагъистаналъул жанисел ишазул министерлъиялъул пресс-хъулухъалда абуна жидер баян жеги хIадур гьечIин. Низам цIунулезул официалиял сайтаздаги гьеб лъугьа-бахъиналда тIаса гьечIо информация.

Амма жибго лъугьа-бахъиналда тIаса суалал руго чIварав МахIмудовасул гIагарлъиялъул. Инсанасул ихтиярал цIунулеб «Дагъистаналъул улбул» гIуцIиялдаса адвокат Елена Денисенкол рагIабазда рекъон, рохьилазулгун МахIмудовасул бухьен букIинчIо.

«Гьесул вац хасаб операциялда чIвана, амма живго ХIабиб гIадатияб гIумру бачунеб чилъун вукIанин абулеб буго гьев лъалез. Динияб рахълдасаги гьесул кIалдиса киданиги радикалияб жо рагIичIин абулеб буго гIагарлъиялъ», - илан бицана Денисенкоца.

МахIмудовасул вацасул ясалъул рос Имангъазали МухIамадовасул адвокатлъун ккола Денисенко. Уголовияб кодексалъул чамалиго бутIаялдалъун гIунтIизабулеб буго гIайиб МухIамадовасда.

Гьелги, мисалалъе, изну гьечIого яргъид гIуцIаразе кумек гьаби, къануналда рекъечIого ярагъ цIуни ва гь.ц. Денисенкол пикру буго, МухIамадовасул уголовияб иш сабаблъун чIван ватизе бегьулин ХIабиб МахIмудов.

ЧIварасул вац АсхIаб МахIмудовас «Эркенлъиялъе» абуна жиндир вац доб къоялда цогидаб машинаялде къватIиве вахъун вукIанин ва чIваразул жаназаби жинда рихьизарураб мехалда жинда бичIчIанин гьел тунка-гIусиязда чIван рукIинчIеллъи.

АсхIаб МахIмудов: «Дида бихьана вацасул жаназаги гьевгун цадахъ вукIарасул жаназаги. Турун рукIана гьел квешго. Биги дида гьениб бихьичIо. ТIадежоялъе, вацасул машина буго «Калина». Гьев боевик вугилан абулеб жоги гьереси буго. Киданиги гьес рохьилазул рахъ ккураб хабар бицичIо. Дунги, вацгIалги, эменги чIун руго гьанже жаназа щвезегIан. вац вукъун хадув, нижеца дандбазе буго щиб гьабилебали».

Гьединго МахIмудовас бицана цIех-рех чагIаз жиндихъ гIарза кьунилан ва гьениб хъван бугин лъугьа-бахъиналда тIаса уголовияб иш къанилан.

XS
SM
MD
LG