Рималъул Папа Франциск лъабго къоялъул сапараялъ щвана Анкараялде. Гьеб буго гьес Туркиялде бухьараб тIоцебесеб сапар ва гьелъул аслияб мурадги буго бусурбабигун диалог гIуцIи ва гьенир ругел христианазул дагьал халкъазе кверчIвай гьаби.
Анкараялда гьев дандачIвазе вуго президент Ражаб Эрдогъангун. Шамат къоялда гьев щвезе вуго Стамбулалда бугеб мунагьал гьечIей Софиял абулеб килисаялде (гьеб букIана мажгитлъунги, гьанже гьениб буго музей) ва ХъахIилаб абулеб мажгиталдеги. Гьединго Франциск щвезе вуго Туркиялъул Республикаялъул ТIоцевесев президент МустIапа Кемал Ататюркил мавзолеялдеги.
Рималъул Папа гьединго дандчIвазе вуго Туркиялда ругел христианазул диналъул батIи-батIиял гIаркьалабазул церехъабигунги.
Франциск вачIиналде Туркиялъул тIадтараз улкаялда кьваризарун рукIана хIинкъигьечIолъи цIуниялъул тадбирал.