4 ноябралда Америкалда тIоритIизе руго Конгрессалде гьоркьохъел абулел рищиял. Гьезда вищизе вуго 435 вакилзабазул КIалгIаялъул гIахьалчиги 36 сенаторги. Гьезда цадахъго 36 штаталда вищулев вуго губернаторги.
БатIи-батIиял баяназда рекъон, ракIалде кколеб буго Конгрессалъул кIиябго Палатаялда цIикIкIунисел бакIал Республиканияб партиялъе щвезе ругин.
Гьанже вакилзабазул КIалгIаялда цIикIкIунисел руго республиканиял, Конгрессалда- демократал.
Гьанже кIиябго Палатаялде республиканиял бергьани, Демократияб партиялдаса президент Барак Обамае хутIараб кIиго соналъ захIмат букIине буго Конгрессалдасан жиндирго инициативаби цере тIезаризе ва жиндие къваригIарал чагIи пачалихъиял хъулухъазда тезе.
Гьаб заманаялда Обамал рейтинг лъалаго гIодобе ккун ва 40-ялда хабуд проценталде рещтIун буго.