3 октябралда Интернеталда загьирабун буго Британиялъул гражданин Алан Хеннинг «Исламияб Пачалихъалъул» рагъухъабаз чIвалеб куц бихьизабулеб видео.
47 сон барав Хеннинг хIалтIулаан таксиялъул шоферлъун. Гьев гъоркьлъалие восун вукIана гъоркьисала декабрь моцIалда. Британиялъул премьер-министр Дэвид Кэмеронил рагIабазда рекъон тIадтараз кIванагIан кIудияб хIаракат бахъила такъсирчагIи ккун, гъозие жаза гьабизе.
Гьелда хурхараб жиндирго лъазабигун цеве вахъана Цолъарал Штатазул президент Барка Обамаги.
Загьирабураб гьесул лъазабиялда абун буго Вашингтоналъ кутьакалда какулеб бугин гьеб вахIшияб иш.
Рехсараб видеоялда «Исламияб пачалихъалъул» рагъухъабаз абулеб буго иргадулав къурбанлъун вукIине вугин американияв Питер Кассиг.
Цолъарал Штатазул бетIерлъуда бугеб коалициялъ жидеде гьарулел гьужумал гьоркьоса къотIизе гьечIони, гьевги чIвазе вугин кватIичIого, ян абулеб буго рагъухъабаз.
«Исламияб пачалихъ» абулеб багъа бачари Америкалъги, Евроцолъиялъги цогидал улкабазги террористикияблъун рикIкIула.