МагъчIваялъе рес

Временный росулъ халат бахъунеб буго хасаб операция


Унсоколо мухъалъул Временное росулъ хамиз къоялдаса нахъе халат бахъунеб буго къуваталъул идарабаз тIобитIулеб хасаб операция. Гьел тадбиразул хIасилалда чIваразул хIакъалъулъ батIи-батIиял баянал руго. Дагъистаналъул къуваталъул идарабаз кьурал баяназда рекъон гьенир хасал тадбирал жеги чанго къоялъ халат рахъинеги рес буго.

18 сентябралдаса нахъе Унсоколо мухъалъул Временное росулъ терроризмалде данде чIараб хасаб низам лъазабун буго. Гьебги лъазабун росулъ гIадамазул рокъо-рокъоре ун, гьенир чIухьал ран, росулъе жанире-къватIире хьвадизе риччачIого къуваталзул идарабаз Временноялда рахчарал изнугьечIого яргъидгIуцIарал ралагьулел ругин лъазабулеб букIана.

Гьедин 2 октябралъул бакъанида гIадамазул рукъзабахъ хал-шал гьабизе унел хасал идарабазул хIалтIухъабазде кьвагьдон руго щалали лъаларел чагIи. НизамцIунулезде тIадекIанцIи гьабурал рахчун рукIиналда щаклъи бугеб мина сверунги ккун гьениб хасал тадбирал тIоритIулел ругин лъазабун букIана Дагъистаналъул къуваталъул идарабаз.

Гьеб хасаб операцияялъул хIасилалда чIваразул хIакъалъулъ батIи-батIиял кьолел руго хасал идарабаз. Дагъистаналъул жанисел ишазул министерлъиялъул вакилзабаз лъазабуна 2 откябралда Временное росулъ хасаб операция тIобитIулаго изнугьечIого яргъидгIуцIаразул лъабго чи чIван вугилан.

Гьел чагIи щалин цIехезе «Эркенлъи» радиоялъ Дагъистаналъул цIех-рехалъул идараялде ахIараб мехалда гьез лъазабуна цебехун рехсараб хасаб операциялда цохIо чи гурони чIван гьечIилан.

Гьевги тIаде балагьун щивали чIезабун бажарулеб хIалалда гьечIила, гьесул жаназа кьвагьараб жо щун цIакъго хвезабун бугила. Гьев щивали чIезавизе хасаб генетикияб анализ гьабизе кколила, гьелъул хIасилал лъазе ккани дагьалдасан анкь къваригIунилан бицана цIех-рехалъул идараялъул вакилас «Эркенлъи» радиоялъе.

Временноялдаса гIадамазул хамиз къоялъ гьеб росулъ чIваразул хIакъалъулъ батIиял баянал руго. Гьезул рагIабазда рекъон хасаб операциялъул хIасилалда кIиго изнугьечIого яргъидгIуцIарав чIван вуго. Цо полициялъул хасаб бутIаялъул хIалтIухъанги лъукъун вуго. НизамцIунулезги тадсикъ гьабуна жидер цо хIалтIухъан лъукъун вукIин.

Гьеб хасаб операциялда чIварал чагIи щалали жеги лъаларилан бицана «Эркенлъи» радиоялъулгун букIараб гара-чIвариялда Временноялдаса Шамилицаги. Гьес гьединго бицана росулъе хутIарал гIадамазулгун бухьен гьабизе щолеб гьечIила жидехъе.

Гьенир гIемерисел руччабиги лъималги хутIун ругила. Бихьиназда росу тезабун бугила. ГЭСалда хIалтIулел бихьинал риччан рукIанила рокъоре, хутIарал гIемерисел Генуре гIагарлъиялъухъе ун ругила. Сон хасаб операция байбихьаралдаса нахъе гьениса гIебеде цин ток свинабунила, хадуб мобильнияб бухьен хвезабунила, гьединлъидал гьаб сагIат Временноялда лъугьа-бахъунеб жо мухIканго лъалеб гьечIила.

Шамиль: «Росулъ хал-шал гьабулеб мехалда гьениб цо минаялда аскIоб лъикI къачIараб бункер батун буго. Гьенибго батараб вагьабиязул гIарцул хабарги бугоха гьаниб бицунеб, мухIканлъи лъаларо. Хасал тадбирал тIоритIулагоги кIиго чи чIван вугин абунаха, гьелги жеги щалали лъалеб гьечIо».

Гьединго Шамилица бицана рузман къоялъул радалги Временноялда кьвагьа-гIанхъи рагIулеб букIанила, жиндихъе щварал баяназда рекъон гьениб халат бахъунеб бугила хамиз къоялъго байбихьараб хасаб оперцияйилан.

Гьединго гьес бицана 18 сентябралдаса нахъего къан бугеб Гендерил тоннельги 10 октябралда лъагIан къан букIине бугилан абурал баянал тIиритIизарун ругин гIадамазда гьоркьобилан. Цебе «Эркенлъи» радиоялъ бицун букIахъе къуваталъул идарабаз ва Дагъистаналъул тIалъиялъ кьурал ахирисел баяназда рекъон тоннель рагьизе ккола 5 октябралда.

Временноялда терроризмалде дандечIараб хасаб низам лъазабун хадуб къан букIараб гьеб тоннель рагьи чанго нухалъ нахъ бахъун букIана. Гьаб сагIат гьенисан цохIо Рихьуниб ГЭСалъул хIалтIухъаби ва туннелалда хIалтIулел чагIи гурони хьвадизе риччалел гьечIо.

Временноялда терроризмалде дандечIараб низам лъазабун хадуб гIадамазул ихтиярал хвезарулел рукIиналда бан гьенире ине хIалбихьун букIана халкъазда гьоркьосеб инсанасул ихтиярал цIунулеб "Хьюман Райтс Вотч" ва «Мемориал» идарабазул вакилзабазги.

Амма къуваталъул идарабаз гьезул цонигиял риччачIо росулъе. Гьениб бугеб захIматаб ахIвал-хIалалъул ва гIадамазул ихтиярал хвезарулел рукIиналде кIвар кьейилан абун тIалаб гьабун инсанасул ихтиярал цIунулез гьал къоязда кагътал хъван руго Россиялъул президент Владимир Путинихъеги, Шималияб Кавказалъул Федералияб Округалда Россиялъул президентасул вакил Сергей Меликовасухъеги.

XS
SM
MD
LG