МагъчIваялъе рес

«ХIалал Экспоялъ» гIахьалчагIи рази гьаричIо


Гьал къоязда Дагъистаналда тIобитIулеб букIана «Каспий ХIалал Экспо» абураб выставка. Экспозицялда жидерго кванил нигIматал ва цогидабги магIишаталъул бутIаялъул тайпаби рихьизаруна Дагъистаналъул батIи-батIиял мухъаздаса ва шагьараздаса вакилзабаз. Амма гьеб тадбиралда гIахьаллъарал рази гьечIо исана гьеб выставка араб куцалдаса.

Каспий «Каспий ХIалал-ЭКСПО» абулеб цIаралда гъоркь выставка исана кIиабилеб нухалда тIобитIана Дагъистаналда. 2013 соналда тIоцебесеб нухалда тIобитIун букIана гьединаб тадбир. Дагъистаналда гьединаб выставка гьабизе кIудияб хIалтIи гьабуна «Рисалат Холдинг» абураб гIуцIиялъ.

Гьелъул нухмалъулев Мокъушдибиров МухIамадица абун букIана жидеда ракIалда бугин хIалалаб кванил нигIматал хIадур гьариялъул рахъалъ машгьур гьабизе Дагъистан.

Гьелъие гIоло Дагъистаналде цIазе ругин батIи-батIиял инвесторал ва щибаб соналъ выставкаялда гIахьаллъулел гIадамазул къадарги цIикIкIинабизе бугилан.

Амма исана выставкаялда гIахьалъарай МахIачхъалаялда гIумру гьабун йигей Хунзахъ мухъалдаса гIадан тIириниги рази гьечIоан выставка тIобитIараб куцалдаса.

Жиндирго цIар загьир гьабизе бокьичIо гьелъие. ЦIакъ ракIбатун кIудияб гъираялда хIадурун иикIанин жий гьей гьеб тадбиралде, амма гьелъул жий йохараб хIасил ккечIин.

Гьелъ гьеб тадбиралде бачIун букIана умумузул заманалдаса нахъего Дагъистаналда хIадур гьарулел давагьабазул, квасул щватабазул, къандалъабзул чанго батIияб тайпа.

Нилъерго чагIиги нахъегIан цун Узбекистаналдасаниги, киссанниги рачIарал гIадамазул къайи-цIаялде букIанин гьениб кIвар кьолеб ва жидерго рисалат абураб цIаралда гъоркь къватIибе биччалеб къайи-цIаялъул вакилзабазе кьунин киналго дипломалги сайигъаталги, выставка лъугIулеб къоялъ гурони кьечIин жиндеги, жинда релълъарал батIи-батIиял мухъаздаса жидерго къайи-цIаялъул бицине рачIарал гIадамазеги рагIи.

Выставкаялда гIахьаллъарай: «Рисалат-Холдинг, Ходинг-Рисалат, гьелеха гьез тIокIаб чIечIого бицунеб букIараб жо гьениб, гьезие кьолел рукIана киналго сайгъаталги.

РекIехъе къуръаналъул аятал цIалулел лъимал рукIана гьенир, гьезие кьечIо щибниги жо гьелги рохизарун. Дицаги рукIана цадахъ рачун дир ясалъул лъимал. РекIехъе Къуръан цIалулей яс йиго дир, гьелъул лъимал. Гьезиеги кьечIо щибниги. Жидерго чагIи гурони цере рахъизе течIо».

Исана «Каспий Экспоялда» гIахьаллъун гъоркьисала жиндица хIадурулел нигIматалгун гьениве вачIун вукIарав Гъуниб мухъалъул Гьонодаса Расулов АхIмадица.

Куракул, ахбазаналъул сокал, гьанал нигIматал хIадурулеб жиндирго цех буго гьесул гьебго мухъалъул КIогьориб росулъ. Амма чIахIи-чIахIиял кванил нигIматал хIадур гьарулел магIишаталъул бутIабазде дандеккун жиндир цехалъ гьитIинабго бакI кколин ва гьелъ чIанин жив гьениве инчIогоян абулеб буго гьес. Расулов АхIмадица рикIкIунеб буго гьеб выставка тIобитIиялъул пайда бугин республикаялъеян.

Расулов АхIмад: «Башкириялдаса рачIарал гIадамаз рачIун рукIана гьенир цIакъ тIагIамал конфеталги печеньябиги. Гьединал нигIматал Дагъистаналда гьечIо. Жидее гьаниб тукен рагьизе бокьун бугилан рукIана гъол. Гьединаб куцалъ хIалтIи гьабуни щай кIолареб гьаниб хIалалаб кванил нигIматал чIезаризе».

ХIалалаб кванил нигIматаздаса гIуцIараб базар Дагъистаналда хIалтIизе биччазе ресал ругин республикаялдаян абуна Расулов АхIмадица хадубги, амма учузаб багьаялъул нигIматал росун ругьунаб нилъер халкъ ругьун гьабизе кIолеб гьечIин гьединал нигIматал росун.

Гьелде тIадеги хIалалаб кванил нигIматал хIадур гьариялъул рахъалъ дагъистаналъул бизнесчагIазе хIукуматалъул рахъалдаса щибниги кумек щолеб гьечIин, жидерго кисинибе бачIунеб гъурщил гурони мискинхалкъалъ кунеб квеналъул гьезие щибниги ургъел гьечIин.

XS
SM
MD
LG