МагъчIваялъе рес

Болъихъ росдал бетIер нахъе ин тIалаб гьабулеб буго


Болъихъ мухъ.

Болъихъ росдал жамаг1аталъ Дагъистаналъул бет1ер Рамазан Болъихъ росдал жамагIаталъ Дагъистаналъул бетIер Рамазан ГIабдулатIиповасухъе кагъат хъван буго росдал бетIер хIалтIудаса тархъан гьави тIалаб гьабун, амма жакъа къоялъги гьезие жаваб щун гьечIо. Кинал гIиллаби ругел гIадамазул росдал бетIер нахъе рехи тIалаб гьабизе?

Болъихъ мухъалъул Болъихъ росдал росдал жамагIаталъ рази гьечIолъи загьир гьабулев буго росдал бетIер - ГIусманов МухIамадрасулил хIалтIудаса. Росдал депутатаз ва жамагIаталъ гьев хIалтIудаса нахъе ин тIалаб гьабулеб буго . Гьедин лъазабулеб буго росдал собраниялъул депутатаз.

Болъихъ росдал бетIер, ГIусманов МухIамадрасул вищун вукIун вуго 20I0 абилеб соналъ.

Амма вищаралдаса цогIаги соналъ росдал бюджет къануналда рекъон къабул гьабичIин, ахираллда, 2013 абилеб соналъул, бюджет къабул гьабулаго гьесухъа рагIи босун букIанин, тIаде соналъул бюджеталлда жаниб щибго макру гьабичIого тезе, амма гьеб къотIи хвезабун, цIидасан хIиллаби гьабураб бюджет къабул гьабизе къваригIун бугин ГIусмановасейилан бицана «Эркенлъи» радиоялъе росдал собраниялъул депутат, МуртазгIали ХIасанхIажиевас.

МуртазгIали ХIасанхIажиев: «2013 абилеб соналъги бюджет къабул гьабулаго гьес депутатал божизаруна тIокIалъ цере риччарал гъалатIал тIокIалъ биччаларилан. Гьаб соналъ гьел депутатаз гьесдаса тIалаб гьабуна, щай бюджеталда гьечIел гIарацхвезаби гьабулеб бугебилан.

ТIалаб гьабуна сессияги ахIун хисизабизе бюджет. Амма сессиялде гьев вачIинчIо. Сессиялде ахIун кодобе кагъат кьедалги араб къомоцIалда жиндиего отпуски хъван анна гьев лъутун. Январь моцIалъ сессиялда нижеца тIалаб гьабуна. Бюджет кибе хвезабурабали документал рихьейилан.

КIалалъ гуреб, кагътидалъун бихьизабейилан. Нахъияб сессиялде гьес рачIана кагътал. Гьениб хал гьабидал служебный подлог батана. Ва нижеца, 10 чиясул гъулбасалги лъун кинал расходал гьаруралали документал рихьейилан тIалаб гьабун кагъат хъвана гьесухъе».

ГIусмановасе къваригIун букIанин гьересиял кагътаздалъун, депутатаз къабул цин гьаричIел, бюджет къабул гьабизе сессия ахIизе, амма киналго депутатаз инкар гьабунин гьенире инее, цинги ГIусмановас прокуратураялде гIарза хъванин депутатаз бюджет къабул гьабулеб гьечIилан бицана МуртазгIалица.

Жал ГIусмановас гьарурал къанунхвезабиялъул хIужаби рицун прокуратураялде инчIого чIеялъе цо гIилла бугин – хIасил букIиналда божунгутIи, щайгурелъул гьезул квералъ квер чурун гьарулел ишал рукIиналъин баян гьабуна гьес.

МуртазгIали ХIасанхIажиев: «Гьелда тIадрекъон гурого, къимат кьолареблъи лъан ниж прокуратураялде, судалде инчIо, щайгурелъул, цебеккун лъалеб букIана гьез гьесие квербакъи гьабулеб букIин.

Нижехъе сессия бакIарреян кагътал рачIиндал, нижеца лъазабуна бюджет кин хвезабурабали мухIканго бицинчIого нижеца гьеб къабул гьабуларилан. Гьел тIолалго суалал росдал жамгIтяб советалъги битIараблъун рикIкIана. Ва хIукму гьабуна росдал бетIер хIалтIудаса нахъе вахъизе»

Гьеб суал борхун Болъихъ росдал жамагIаталъул вакилзаби ва росдал депутатал МахIачхъалаялде рачIун руго 26 абилеб августалъ, гьениб Алексей ХIасанов, ГIалиев ГIалибег ва цогидал хIакимзаби ракIарараб бакIалда къотIи ккун буго гьеб суал тIубай нахъбахъизе. Изну гьечIого яргъид гIуцIаразул къокъаби Дагъистаналде кIанцIаралдаса 15 сон тIубаялъул тадбирал тIоритIун лъугIизегIан.

ХIасанхIажиевас бицана, жакъа къоялъги щибго хисараб ва роцIараб жо гьечIин, ГIусмановги хIалтIудецин вачIунев гьечIин. Дагъистаналъул бетIерасги жаваб гьабичIого танин жидер кагъат. Гьелъ, 30 сентябрялъ данделъиги ахIун нахъе рехизе вугин депутатазул собраниялъ ГIусманов хIалтIудаса.

«Эркенлъи» радиоялъ бухьен гьабуна живго ГIусмаговгун ва росдал администрациягун, амма гьезухъа баянал щвечIо.

XS
SM
MD
LG