Россиялъ аннексия гьабураб Крымалъул нухмалъиялъ гIумруялде бахъинабун буго 19 августалда бахъараб «Крымалъул татаразул республиканияб библиотека къаялъул ва гьелъул бакIалда пачалихъияб бюджеталъул гIуцIи рагьиялъул хIакъалъ» абураб буюри.
Симферополалда рехсараб библиотека къаялъул хIакъалъулъ лъазабулеб буго нижер радиоялъул Крымалда ругел мухбираз.
ЦIех-рехазул ва Крымалъул кьалбазул халкъазул квербакъи гьабиялъул фондалъул президент Надир Бекировас лъазабун буго гьезда, хамис къоялъ маркIачIуда жиде тIадекIанцIанин маскаби хурал жал щалали лъаларел гIадамалин. Гьез жив машинаялдаса къватIиве вахъун гIодове реханин ва жинхъа паспортги мобилияб телефонги бахъанин.
Бекировасул пикруялда, тIадекIанцIиялъул мурад кколеб буго 22-23 сентябралда Нью-Йоркалда тIобитIизесеб БакIалъулал халкъазул Цолъарал миллатазул конференциялде гьев иналъе ресал къотIизари.