Украиналда рагъазулъ хун вуго Псковалъул десанталъулгун-гьужум гьабулеб дивизиялъул тIубараб ротагIан чи. Гьедин хъвалеб буго «Псковская губерния» газетаялъ. Гьезухъе щун руго дивизиялъул рагъухъабазул кIалъаязул хIакъал аудиоял. Гьездасан баянлъулеб буго 80 чи вугеб ротаялъул чIаго 10-гIан чи гурони хутIичIолъи.
Газеталъул бетIер Лев Шлосбергил баяназда рекъон, гьел хваразул гIагаразда кинабго балъго гьабизабулеб буго материалияб кумек гьабиларин хIинкъабиги кьун. Хваразда гьоркьор рехсолел руго жидер хобал Псковалъул хабзалалъ ратаралги.
Газеталъ цебе гьел хIужабазул бицун хадуб гьеб дивизиялдаса чагIазул хобаздаса нахъе рахъун руго гьезул цIарал хъварал хъарщал ва хабзал цIунизе гIадамал тун руго. Живго Шлосберг вухун вуго щалали лъаларел чагIаз ва гьанже гьев азарханаялде ккун вуго.
Россиялъул улка цIуниялъул министрелъиялъ коментарий кьолеб гьечIо «Псковская губерния» газеталъ гьанже хъваралъе. Цебе гьеб идараялъ нахъчIвалеб букIана россиялъул аскарал Украиналъул территориялда рагъулел ругин абураб.