НАТОялъ рикIкIунеб буго, Украиналъул территориялда вагъулев вугин азаргоялдасаги цIикIкIун Россиялдаса рагъулавин.
Гьелъул хIакъалъулъ, Шималияб Атлантикаялъул блокалъул вакиласда базабун лъазабуна магрибалъул информациялъул агентлъияз. Украиналда Цолъарал Штатазул вакил Джеффри Пайетица Твиттералда хъвана, Украиналъул территориялда рагъулел Россиялъул рагъулазул къадар цIикIкIунеб бугин.
Гьес гьединго хъвалеб буго, Россиялъ Украиналъул машрикъалъул рахъалде ритIулел ругин авиациялде данде хIалтIизарулел ракетабазул бищунго цIиял системабийин, гьездаго гъорлъ SA-22.
Германиялъул бундестагалъул КъватIисел ишазул Комитеталъул бетIер Норбепт Ротгеница лъазабуна, Украиналда цIидаса хIалуциналъул даража тIаде иналъе гIоло, Евроцолъиялъ Россиялде данде цIиял санкцияби хIалтIизаризе кколин.
Reuters агентлъиялъе комментариял гьарулаго, гьес абуна, санкцияби гьаричIого тей Россиялъул президент Владимир Путиница къабул гьабизе бугин, Евроцолъиялъул тохлъи ва тамахлъи хIисабалдайин.
Гьелда цебе Украиналъул президент Петр Порошенкоца лъазабуна, Украиналде жанире рачIанин Россиялъул рагъул къуваталин.
Москваялъ Киевалъул ва Магърибалъул политиказул лъазабиял нахъ чIвалел руго.